मॉन्सूनची माघार वेगाने; महाराष्ट्राच्या निम्म्या भागातून पाऊस परतला

नाशिक। दि. ४ ऑक्टोबर २०२६ : देशासह महाराष्ट्रातही नैऋत्य मोसमी वाऱ्यांच्या परतीचा वेग वाढला आहे. राज्याच्या जवळपास निम्म्या भागातून मॉन्सूनने माघार घेतल्याची माहिती हवामान विभागाने शनिवारी दिली. देशाच्या उत्तर आणि मध्य भागातील अनेक राज्यांतूनही मॉन्सून परतला असून, येत्या काही दिवसांत त्याचा परतीचा प्रवास आणखी पुढे सरकण्याची शक्यता आहे.

मॉन्सूनच्या माघारीसाठी सध्या वातावरण पोषक बनले आहे. त्यामुळे पुढील दोन ते तीन दिवसांत विदर्भाचा बहुतांश भाग, मराठवाडा, मध्य महाराष्ट्रातील आणखी काही प्रदेश, तसेच छत्तीसगड, तेलंगण आणि उत्तर कर्नाटकातील काही भागांतून नैऋत्य मोसमी वारे परतण्याची शक्यता हवामान विभागाने व्यक्त केली आहे.

🔎 हे वाचलं का?:  नाशिक-त्र्यंबकेश्वर वाहतुकीत २४ ते २७ नोव्हेंबरदरम्यान महत्वाचे बदल

दरम्यान, गेल्या दोन दिवसांत वातावरणातील सापेक्ष आर्द्रतेत मोठी घट झाली आहे. पावसाचे प्रमाण कमी होत असून आकाश निरभ्र राहण्याचे प्रमाण वाढले आहे. त्याचबरोबर उन्हाची तीव्रताही वाढल्याने राज्यातील अनेक भागांत ‘ऑक्टोबर हीट’चा अनुभव येऊ लागला आहे. नैऋत्य मोसमी वाऱ्यांचा प्रभावही जवळपास संपुष्टात आला आहे.

🔎 हे वाचलं का?:  नाशिक: थंडीचा कडाका वाढला; पुढील आठवडाभर हुडहुडी कायम राहण्याचा अंदाज

उत्तर गुजरात आणि लगतच्या नैऋत्य राजस्थानच्या परिसरात प्रतिचक्राकार वाऱ्यांची स्थिती निर्माण झाली आहे. या प्रणालीमध्ये केंद्रभागातून बाहेरील दिशेने हवा फिरत असल्याने मॉन्सूनच्या परतीस पोषक वातावरण तयार झाले आहे.

१९ सप्टेंबरपासून माघारीचा प्रवास

यंदा १९ सप्टेंबर रोजी पश्चिम राजस्थानातून मॉन्सूनच्या परतीला सुरुवात झाली. त्यानंतर २३ सप्टेंबरपर्यंत देशाच्या वायव्य भागातून मॉन्सूनने माघार घेतली होती. आता शनिवारी (दि. ३) उत्तर भारतातील उर्वरित भागासह गुजरात, मध्य प्रदेश, उत्तर प्रदेश, बिहार, झारखंड आणि छत्तीसगडमधूनही मॉन्सून परतला आहे.

🔎 हे वाचलं का?:  नाशिक: दुचाकी वाहनांसाठी ‘एमएच १५-एलजी’नवीन मालिका २३ नोव्हेंबरपासून सुरू

सध्या मॉन्सूनच्या परतीची सीमा सुपौल, रांची, रायपूर, ब्रह्मपुरी, परभणी, बारामती आणि हर्णे या भागांपर्यंत पोहोचली आहे. त्यामुळे महाराष्ट्रातील उर्वरित भागातूनही आगामी काही दिवसांत मॉन्सूनची माघार वेगाने होण्याची शक्यता आहे.

Loading

The Title "Nashik Calling" is approved by Office Of The Registrar Of Newspapers For India (Ministry Of Information And Broadcasting). RNI: MAHMAR51790