नाशिक: ऑक्टोबर हीटचा तडाखा सुरूच; नाशिकचे कमाल तापमान ३५ अंशांवर !

पुढील आठवड्यात तापमानात आणखी वाढ होण्याची शक्यता

नाशिक। दि. ३ ऑक्टोबर २०२६: शहरासह परिसरात ऑक्टोबरच्या सुरुवातीलाच उन्हाचा चटका वाढला असून, शुक्रवारी (दि. २) कमाल तापमानाने ३५.१ अंश सेल्सिअसचा टप्पा गाठला. परतीचा पाऊस अपेक्षेप्रमाणे न झाल्याने वातावरणातील उष्णता वाढली असून, दिवसा उन्हाचा कडाका आणि रात्री उकाडा जाणवत आहे.

शुक्रवारी नाशिकमध्ये कमाल तापमान ३५.१ अंश सेल्सिअस, तर किमान तापमान २०.३ अंश सेल्सिअस नोंदविण्यात आले. याआधी गुरुवारी (दि. १) कमाल तापमान ३४.८ अंशांवर होते. एका दिवसात तापमानात झालेल्या वाढीमुळे ‘ऑक्टोबर हीट’ची तीव्रता अधिक जाणवली.

🔎 हे वाचलं का?:  नाशिकमध्ये आता रोबोटिक सर्जरीची सुविधा; अपोलो हॉस्पिटल्समध्ये अत्याधुनिक युनिट सुरू

दिवसभर वातावरणात उष्णता जाणवत असल्याने नागरिक घामाघूम झाले होते. सकाळी आणि सायंकाळच्या वेळीही वातावरणातील आर्द्रतेत घट झाल्याचे जाणवले. २ ऑक्टोबरला शासकीय सुट्टी असल्याने तसेच कडक उन्हामुळे दुपारच्या सुमारास शहरातील प्रमुख रस्त्यांवरील वर्दळ तुलनेने कमी झाली होती.

उष्णतेपासून दिलासा मिळविण्यासाठी नागरिकांनी थंड पेये, फळांचे रस तसेच अननसासारख्या फळांकडे मोर्चा वळविला. त्यामुळे हातगाड्या आणि ज्यूस सेंटरवर ग्राहकांची गर्दी वाढताना दिसली. घरांमध्ये तसेच व्यावसायिक आस्थापनांमध्ये पंखे, कुलर आणि वातानुकूलित यंत्रणांचा वापरही वाढला आहे.

🔎 हे वाचलं का?:  नाशिकच्या 'या' विविध भागांतील वीजपुरवठा रविवारी (दि. २२) बंद राहणार...

परतीचा पाऊस कमी; तापमानात वाढ
यंदाच्या पावसाळ्यात तुलनेने कमी झालेला पाऊस आणि त्यानंतर परतीच्या पावसाची कमी झालेली सक्रियता यामुळे ऑक्टोबरच्या सुरुवातीलाच तापमान वाढले आहे. पुढील काही दिवस ही परिस्थिती कायम राहण्याची शक्यता असून, त्यानंतर तापमानात काहीशी घट होऊ शकते.

मात्र, पुढील आठवड्यात पुन्हा तापमानाचा पारा वाढण्याची शक्यता वर्तविण्यात आली आहे. ऑक्टोबरअखेरपर्यंत कमाल आणि किमान तापमानात चढ-उतार कायम राहण्याची शक्यता असून, दिवसा उष्णता अधिक जाणवू शकते.

Loading

The Title "Nashik Calling" is approved by Office Of The Registrar Of Newspapers For India (Ministry Of Information And Broadcasting). RNI: MAHMAR51790