नाशिक: शहरात पावसाचे धुमशान; विविध भागात झाडे कोसळली

नाशिक | १२ मे २०२५: नाशिक शहरात रविवारी (११ मे) दुपारी अवकाळी पावसाने जोरदार हजेरी लावली. वादळी वाऱ्यांसह विजांच्या कडकडाटात आणि ढगांच्या गडगडाटात सुमारे तासभर शहराला झोडपून काढले. दुपारी २:४५ ते ३:३० या दरम्यान ताशी २५ ते ३० किमी वेगाने वारे वाहत होते.

या वाऱ्यामुळे सिडको, सातपूर तसेच मध्यवर्ती भागात अनेक झाडे उन्मळून पडली. अनेक ठिकाणी झाडे पडल्यामुळे वाहनांचेही नुकसान झाले. सातपूरमधील गोरक्षनगर परिसरात काही घरांवरील पत्रे उडून गेली असल्याची माहिती आहे.

शहरात एकूण ५० पेक्षा अधिक झाडे पडल्याचा प्राथमिक अंदाज अग्निशमन विभागाने वर्तविला आहे. प्रशासनाकडून बाधित भागांमध्ये मदतकार्य सुरू असून, जनतेला आवश्यक ती काळजी घेण्याचे आवाहन करण्यात आले आहे.