सप्टेंबरमध्येच नाशिककरांना ‘ऑक्टोबर हीट’चा तडाखा; पाणीटंचाईचे सावट

नाशिक। दि. २४ सप्टेंबर २०२६: नाशिक शहरात सप्टेंबर महिन्यातच उन्हाचा चटका वाढला असून, गेल्या चार दिवसांपासून कमाल तापमान ३२ अंश सेल्सिअसच्या आसपास नोंदले जात आहे. त्यामुळे नागरिकांना यंदा नेहमीपेक्षा लवकर ‘ऑक्टोबर हीट’चा अनुभव येत आहे.

एकीकडे तापमानात वाढ होत असताना दुसरीकडे मान्सूनने परतीचा प्रवास वेगाने सुरू केल्याने जिल्ह्यात दमदार पावसाची शक्यता कमी झाली आहे. पश्चिम भागातील काही तालुके वगळता जिल्ह्याच्या बहुतांश भागात यंदाचा पाऊस अपेक्षेच्या तुलनेत कमी राहिला आहे. त्यात परतीच्या पावसानेही साथ न दिल्यास आगामी काळात पाणीटंचाईची परिस्थिती अधिक गंभीर होण्याची शक्यता आहे.

🔎 हे वाचलं का?:  नाशिकच्या 'या' विविध भागांतील वीजपुरवठा रविवारी (दि. २२) बंद राहणार...

खरीप पिकांवर दुहेरी संकट:
पावसाचे प्रमाण कमी असलेल्या भागांमध्ये खरीप पिकांना आधीच फटका बसला आहे. आता परतीचा पाऊस अपेक्षेप्रमाणे झाला नाही, तर पिकांचे नुकसान वाढण्याची भीती आहे. वाढत्या तापमानामुळे जमिनीतील ओलावा झपाट्याने कमी होत असून, त्याचा परिणाम पिकांच्या वाढीवर होऊ शकतो. तसेच विहिरी आणि बोअरवेलच्या पाणीपातळीतही घट होण्याची शक्यता व्यक्त केली जात आहे.

🔎 हे वाचलं का?:  नाशिक: सेवानिवृत्त आरटीओ अधिकाऱ्याच्या आत्महत्येप्रकरणी मुलगा, सून आणि मुलीसह चौघांवर गुन्हा

उकाड्यामुळे आरोग्याच्या तक्रारी वाढल्या:
अचानक वाढलेल्या उष्णतेचा परिणाम नागरिकांच्या आरोग्यावरही जाणवत आहे. डिहायड्रेशन, डोकेदुखी तसेच तापाच्या तक्रारी वाढत असल्याचे दिसून येत आहे. दुपारच्या वेळेत उन्हाची तीव्रता अधिक जाणवत असल्याने नागरिक शक्यतो घराबाहेर पडणे टाळत आहेत. उष्णतेपासून बचाव करण्यासाठी शीतपेय, पाणी आणि रुमालाचा वापर केला जात आहे.

🔎 हे वाचलं का?:  नाशिक: ट्रकचालकाला फायटरने मारहाण करणारे तिघे पोलिसांच्या ताब्यात

आणखी काही दिवस उकाडा कायम राहण्याची शक्यता:
मान्सूनचा परतीचा प्रवास वेगाने सुरू असल्याने नाशिक जिल्ह्यात मोठ्या प्रमाणावर परतीचा पाऊस होण्याची शक्यता कमी असल्याचे हवामान अभ्यासकांचे म्हणणे आहे. वातावरणातील वाढलेला कोरडेपणा आणि उष्णतेचा प्रभाव पुढील काही दिवस कायम राहण्याची शक्यता आहे.

Loading

The Title "Nashik Calling" is approved by Office Of The Registrar Of Newspapers For India (Ministry Of Information And Broadcasting). RNI: MAHMAR51790