नाशिक। दि. २ ऑक्टोबर २०२६: शहर आणि परिसरात ऑक्टोबरच्या सुरुवातीलाच उन्हाची तीव्रता वाढली असून ‘ऑक्टोबर हीट’चा चटका नाशिककरांना जाणवू लागला आहे. गुरुवारी (दि. १) कमाल तापमान ३४.८ अंश सेल्सिअस नोंदविण्यात आले. बुधवारी नोंदलेल्या ३४.३ अंशांच्या तुलनेत तापमानात वाढ झाली.
दिवसभर वातावरणात उष्णता जाणवत असल्याने नागरिकांची चांगलीच गैरसोय झाली. विशेषतः दुपारच्या वेळी उन्हाची तीव्रता अधिक जाणवत होती. त्यामुळे शहरातील प्रमुख रस्त्यांवरील वर्दळही काही प्रमाणात कमी झाल्याचे दिसून आले.
दरम्यान, रात्रीच्या वेळीही उकाडा जाणवत असून गुरुवारी किमान तापमान २०.५ अंश सेल्सिअस नोंदविण्यात आले. बुधवारच्या तुलनेत गुरुवारी सकाळी आणि सायंकाळी वातावरणातील आर्द्रतेचे प्रमाणही कमी झाल्याचे निरीक्षण नोंदविण्यात आले.
वाढत्या उष्णतेचा परिणाम नागरिकांच्या दैनंदिन जीवनावर दिसू लागला आहे. उन्हापासून दिलासा मिळवण्यासाठी शीतपेय आणि फळांच्या ज्यूसला मागणी वाढली आहे. तसेच घरांमध्ये पंखे, कूलर आणि वातानुकूलित यंत्रांचा वापर पुन्हा वाढू लागला आहे. आगामी दिवसांत ‘ऑक्टोबर हीट’ची तीव्रता आणखी जाणवण्याची शक्यता असल्याने नागरिकांनी उष्णतेपासून बचावासाठी आवश्यक काळजी घेणे गरजेचे आहे.
