नाशिक। दि. १० मार्च २०२६: शहर आणि परिसरात मागील दोन दिवसांपासून तापमानात लक्षणीय वाढ झाली असून कमाल तापमानाचा पारा ३७.१ अंश सेल्सिअसपर्यंत पोहोचला होता. मात्र सोमवारी (दि. ९) दुपारनंतर वारा वाहू लागल्याने नागरिकांना उन्हाच्या तीव्र झळांपासून काहीसा दिलासा मिळाला. सायंकाळी कमाल तापमान ३६.५ अंश सेल्सिअस इतके नोंदविण्यात आले.
दरम्यान, किमान तापमान १५.२ अंश सेल्सिअस इतके नोंदवले गेले असून मागील दोन दिवसांच्या तुलनेत तापमानात अत्यल्प घट झाली आहे. मार्चच्या पहिल्याच आठवड्यात वाढलेल्या तापमानामुळे शहरातील नागरिकांना उष्णतेचा आणि उकाड्याचा त्रास जाणवत आहे.
दुपारच्या वेळेत उन्हाची तीव्रता वाढत असल्याने अनेक नागरिक घराबाहेर पडणे टाळत असल्याचे चित्र दिसून येत आहे. परिणामी शहरातील मध्यवर्ती भागासह उपनगरांतील प्रमुख रस्त्यांवरील वर्दळही कमी झाल्याचे पाहावयास मिळत आहे.
