नाशिक, ११ ऑगस्ट २०२५: इगतपुरीतील रेनफॉरेस्ट रिसॉर्टमध्ये सुरू असलेल्या परदेशी नागरिकांना गंडा घालणाऱ्या अवैध कॉल सेंटरवर केंद्रीय गुन्हे अन्वेषण विभागाने (CBI) शनिवारी (दि. ९) मध्यरात्री धाड टाकून कारवाई केली. या ऑपरेशनमध्ये पाच जणांना अटक करण्यात आली असून, कोट्यवधींचा मुद्देमाल जप्त झाला आहे.
मुंबईतील काही व्यक्तींनी या रिसॉर्टमध्ये बनावट कॉल सेंटर सुरू करून अमेरिकेतील, कॅनडातील तसेच इतर देशांतील नागरिकांना लक्ष्य केले होते. अ‍ॅमेझॉन सपोर्ट सर्व्हिसेसचे भासवून संबंधितांना फोन करून त्यांची वैयक्तिक माहिती मिळवत गिफ्ट कार्ड व क्रिप्टोकरन्सीच्या माध्यमातून फसवणूक केली जात होती. ८ ऑगस्ट रोजी मिळालेल्या तक्रारीनंतर सीबीआयने गुप्त तपास सुरू केला आणि खात्री पटताच कारवाई केली.
धाडीवेळी कॉल सेंटरच्या २० खोल्यांमध्ये ६२ जण काम करत असल्याचे आढळले. यात टेलिकॉलर्स, व्हेरिफायर अशा विविध भूमिका निभावणाऱ्या कर्मचाऱ्यांचा समावेश होता. अटक करण्यात आलेल्यांमध्ये विशाल यादव, शेबाझ, दुर्गेश, अभय ऊर्फ राजा आणि समीर ऊर्फ कालिया ऊर्फ सोहेल यांचा समावेश आहे.
जप्त मुद्देमाल:
- ४४ लॅपटॉप व ७१ मोबाईल फोन
- ₹१.२० कोटींची बेहिशोबी रोकड
- ५०० ग्रॅम सोने
- ७ आलिशान कार
- सुमारे ₹५ लाख मूल्याची क्रिप्टोकरन्सी
- ₹१.२६ लाख मूल्याची गिफ्ट कार्ड्स
ही कारवाई करण्यासाठी सीबीआयच्या १५ अधिकाऱ्यांचे पथक ४ वाहनांतून इगतपुरीत दाखल झाले होते. एका कंपनीच्या नावाने हे रिसॉर्ट बुक करण्यात आले होते. मध्यरात्री अंमलात आणलेल्या या धाडीत संपूर्ण रॅकेट उध्वस्त करण्यात सीबीआयला यश मिळाले.
नाशिकच्या सर्व अपडेट्ससाठी आमचा व्हॉट्सअ‍ॅप ग्रुप जॉईन करा...
The Title "Nashik Calling" is approved by Office Of The Registrar Of Newspapers For India (Ministry Of Information And Broadcasting). RNI: MAHMAR51790