नाशिक। दि. १ ऑक्टोबर २०२६: छत्रपती शाहू महाराज संशोधन, प्रशिक्षण व मानव विकास संस्था (सारथी) आणि इंडो जर्मन टूल रुम यांच्याद्वारे राज्यातील सारथी संस्थेच्या लक्षित गटातील सुशिक्षित बेरोजगार युवक- युवतींसाठी विनामूल्य निवासी/अनिवासी पूर्ण वेळ प्रशिक्षणाचे आयोजन करण्यात येणार आहे, अशी माहिती सारथीच्या नाशिक विभागीय कार्यालयाचे उपव्यवस्थापकीय संचालक प्रशांत जोशी यांनी प्रसिद्धीस दिलेल्या पत्रकान्वये दिली आहे.
राज्यातील मराठा, कुणबी, कुणबी मराठा, मराठा कुणबी या लक्षित गटातील समाजाचा सामाजिक, आर्थिक व शैक्षणिक विकासासाठी छत्रपती शाहू महाराज संशोधन, प्रशिक्षण व मानव विकास संस्था, पुणेची (सारथी) स्थापना करण्यात आली आहे. या संस्थेच्या माध्यमातून १८ ते ३५ वर्षे वयोगटातील आणि दहावी, बारावी, आयटीआय, अभियांत्रिकी पदवी, पदविका प्राप्त उमेदवारांसाठी प्रशिक्षण होईल.
सदरचा प्रशिक्षण वर्ग छत्रपती संभाजीनगर, वाळूंज, पुणे, कोल्हापूर, नागपूर येथे होणार आहे. त्यासाठी https://sarthi.maharashtra.gov.in/ तसेच https://www.igtr-aur.org/ या संकेतस्थळावर अधिक माहिती उपलब्ध आहे. अर्ज स्वीकारण्याची अंतिम तारीख २ ऑक्टोबर २०२६ अशी आहे. या प्रशिक्षण वर्गाचा पात्र युवक- युवतींनी लाभ घ्यावा, असे आवाहन करण्यात आले आहे.
