नाशिक। दि. २३ एप्रिल २०२६: शहरात दुचाकीवरून येत मोबाईल हिसकावण्याच्या घटना पुन्हा समोर येत असून, अशाच प्रकारात एका कर्मचाऱ्याचा मोबाईल लांबविल्याची घटना घडली आहे. याप्रकरणी अज्ञात दोन इसमांविरोधात गुन्हा दाखल करण्यात आला आहे.
पोलिसांनी दिलेल्या माहितीनुसार, फिर्यादी हर्षलकुमार बागड हे दि. २१ एप्रिल रोजी रात्री नोकरीच्या ठिकाणी नाईट शिफ्टमध्ये होते. रात्री सुमारे ९.१५ ते १० वाजेच्या जेवणानंतर ब्रेकदरम्यान ते साखलाज फर्निचर मॉल ते संदिप हॉटेल परिसरात ते पायी फेरफटका मारत मोबाईलवर बोलत होते.
दरम्यान, ब्रेक संपत आल्याने ते पुन्हा कार्यालयाकडे परतत असताना संदिप हॉटेलकडून गडकरी चौकाच्या दिशेने जाणाऱ्या दुचाकीवरील दोन अज्ञात इसमांनी त्यांच्या हातातील सुमारे ४० हजार रुपये किंमतीचा मोबाईल जबरदस्तीने हिसकावून पळ काढला.
या प्रकरणी संबंधित पोलिस ठाण्यात गुन्हा दाखल करण्यात आला असून, सीसीटीव्ही फुटेजच्या आधारे संशयितांचा शोध सुरू आहे. अशा चोरट्यांचा बंदोबस्त करण्याची मागणी नागरिक करत आहेत. (मुंबई नाका पोलीस स्टेशन गुन्हा रजिस्टर क्रमांक: १९५/२०२६)
