नाशिक। दि. १३ मे २०२६: बँक अधिकाऱ्याचे सोंग घेऊन सायबर भामट्यांनी एका ८० वर्षीय वृद्धाची तब्बल ९५ हजार रुपयांची ऑनलाईन फसवणूक केल्याची घटना उघडकीस आली आहे. याप्रकरणी भद्रकाली पोलिस ठाण्यात गुन्हा दाखल करण्यात आला असून पोलिसांकडून तपास सुरू आहे.
पोलिसांनी दिलेल्या माहितीनुसार, काठे गल्ली परिसरात राहणाऱ्या वृद्धाला दुपारी साडेदोनच्या सुमारास अनोळखी क्रमांकावरून फोन आला. समोरच्या व्यक्तीने स्वतःला बँकेचा कर्मचारी असल्याचे सांगत, “तुमच्या खात्यात चुकीने ५ हजार रुपये जमा झाले आहेत,” असे सांगितले. त्यानंतर संबंधिताने मोबाईलवर एक स्कॅनर पाठवून यूपीआय पिन टाकण्यास सांगितले.
वृद्धाने सांगितल्याप्रमाणे प्रक्रिया पूर्ण करताच त्यांच्या बँक खात्यातून ऑनलाईन व्यवहाराद्वारे ९५ हजार रुपये काढून घेण्यात आले. मोबाईलवर पैसे वजा झाल्याचे मेसेज आल्यानंतर फसवणुकीचा प्रकार उघड झाला. सायबर फसवणुकीच्या या प्रकरणाचा अधिक तपास भद्रकाली पोलिस करत आहेत.
