मुंबई। दि. १३ जानेवारी २०२६: महानगरपालिका निवडणुकांच्या पार्श्वभूमीवर राज्यात आदर्श आचारसंहिता लागू असताना ‘लाडकी बहीण’ योजनेचा नियमित किंवा प्रलंबित लाभ देण्यास हरकत नसली, तरी जानेवारी महिन्याचा लाभ अग्रिम स्वरूपात देण्यास राज्य निवडणूक आयोगाने स्पष्ट नकार दिला आहे.
“मकर संक्रांतीपूर्वी लाडक्या बहिणींच्या खात्यात डिसेंबर व जानेवारीचे एकत्रित तीन हजार रुपये जमा होणार,” अशा स्वरूपाच्या वृत्तांमुळे आयोगाकडे तक्रारी दाखल झाल्या होत्या.
या पार्श्वभूमीवर योजनेसंदर्भात शासनाने घेतलेल्या निर्णयांची वस्तुस्थिती स्पष्ट करण्याचे निर्देश राज्य निवडणूक आयोगाने मुख्य सचिवांना दिले होते.
मुख्य सचिवांनी सादर केलेल्या अहवालात नमूद करण्यात आले की, ४ नोव्हेंबर २०२५ रोजी स्थानिक स्वराज्य संस्थांच्या सार्वत्रिक निवडणुकांसाठी आदर्श आचारसंहिता लागू करताना आयोगाने एकत्रित आदेश जारी केले आहेत. त्यानुसार, निवडणूक जाहीर होण्यापूर्वी प्रत्यक्षात सुरू झालेल्या विकासकामांप्रमाणेच योजनाही आचारसंहिता काळात सुरू ठेवता येतात.
या पार्श्वभूमीवर आयोगाने स्पष्ट केले आहे की, ‘लाडकी बहीण’ योजनेचा नियमित लाभ देणे मान्य असले तरी कोणताही हप्ता अग्रिम स्वरूपात देता येणार नाही. तसेच आचारसंहिता कालावधीत नवीन लाभार्थ्यांची निवड करण्यासही मनाई करण्यात आली आहे.
