नाशिक (प्रतिनिधी): शहरात झालेल्या अपघातात एका आठ वर्षीय मुलीचा मृत्यू झाला आहे. दिंडोरी रोडवर चार चाकीवाहनाच्या धडकेत चाकाखाली चिरडली गेल्याने आठ वर्षीय मुलगी जागीच ठार झाल्याची दुर्दैवी घटना घडली. या अपघातानंतर संतप्त झालेल्या नागरिकांनी वाहनाची तोडफोड केली. तसंच वाहन चालकाला मारहाण केल्याचा आरोप करण्यात आला आहे. अपघातात मुलीचा मृत्यू झाल्याने हळहळ व्यक्त केली जात आहे.
पंचवटी परिसरात असलेल्या दिंडोरी रोडवरील अवधूतवाडी रस्त्यालगत सोमवारी १ मे रोजी संध्याकाळी सहा वाजेच्या सुमारास एका चारचाकी मालवाहू वाहनाखाली येऊन जोया सलीम शेख (वय वर्षे ८) या मुलीचा मृत्यू झाला. यावेळी संतप्त झालेल्या जमावाने वाहनाची तोडफोड करीत चालकाला मारहाण केली. अपघातानंतर या ठिकाणी मोठ्या प्रमाणात गर्दी जमली होती. गर्दीमुळे काही काळ दिंडोरी रोडवरील वाहतूक खोळंबली होती.
दरम्यान, जोया हिच्या डोक्यावरून गाडी गेल्याने ती गंभीर जखमी झाली आणि तिचा दुर्दैवी मृत्यू झाला. या घटनेची माहिती मिळताच पंचवटी पोलीस ठाण्याच्या वरिष्ठ पोलीस अधिकाऱ्यांसह पोलीस कर्मचाऱ्यांनी घटनास्थळी तात्काळ धाव घेतली. यावेळी जमलेली गर्दी नियंत्रणात आणण्यासाठी अति शीघ्र दलाच्या पथकाला पाचारण करण्यात आले होते. अवधूतवाडी ते मायको दवाखाना या परिसरात अपघात झाल्यानंतर जवळपास पाचशे ते सहाशे जणांचा जमाव जमला होता.
परिस्थितीवर नियंत्रण मिळवल्यानंतर जमाव पांगल्याने रस्त्यावरील वाहतूक सुरळीत झाली. आठ वर्षांच्या जोयाचा अपघातात मृत्यू झाल्याने तिच्या वडिलांनी रस्त्यावरच हंबरडा फोडला. याप्रकरणी जोयाच्या नातेवाईकांनी पंचवटी पोलीस ठाण्यात तक्रार दिली. पोलिसांनी वाहनचालकाला ताब्यात घेतले आहे.
अपघातात मृत्यू झालेल्या जोया शेखचे वडील सलीम शेख वय ३० हे अवधूत वाडी येथील सुलभ सौचालयाचा सांभाळ करतात. तसेच डाळींब मार्केट येथे पॅकिंगचे काम करतात. पती-पत्नी आणि मुलगी असा त्यांचा परिवार होता. एकुलती एक मुलगी गेल्याने शेख कुटुंबाला धक्का बसला आहे. या घटनेने परिसरात हळहळ व्यक्त केली जात आहे.
