नाशिक: प्रतिबंधित गुटख्याचा मुख्य सप्लायर जेरबंद; 2 दिवसांची पोलिस कोठडी
नाशिक (प्रतिनिधी): विहीतगाव परिसरातील ८० हजार रुपयांचा प्रतिबंधित गुटखा साठ्याप्रकरणी उपनगर पोलिसांनी मुख्य सूत्रधाराला जेरबंद केले.
अनिल ऊर्फ बाळू प्रभाकर अमृतकर (५२, रा. रामसेतू सोसायटी, नाशिक-पुणे रोड) असे नाव असून, शहरात प्रतिबंधित गुटखा तोच सप्लायर करीत असल्याचे तपासातून समोर आले आहे.
याप्रकरणी शहर गुन्हे शाखेच्या अमलीपदार्थ विरोधी पथकाने बुधवारी (ता. १०) सापळा रचून विहीतगाव येथे संशयित सोमनाथ चौधरी (४६, रा. माऊली निवास, वृंदावन कॉलनी, विहीतगाव) रिक्षातून प्रतिबंधित गुटख्याच्या गोण्या उतरविल्या जात असताना अटक केली होती.
याप्रकरणी उपनगर पोलिसात गुन्हाही दाखल करण्यात आला होता. सदर गुन्ह्याचा तपास करताना शहरात आणण्यात येणारा प्रतिबंधित गुटख्याचा संशयित बाळू अमृतकर हा मुख्य सप्लायर असल्याचे समोर आले होते.
त्याचा शोध घेत असताना पोलिसांनी भद्रकालीतून झाईद अन्सार शेख (२३) यास अटक केली. अखेर बाळू अमृतकर यालाही त्याच्या राहत्या घरातून उपनगर पोलिसांनी अटक केली आहे.
महाराष्ट्रात प्रतिबंधित असलेला गुटखा संशयित अमृतकार हा शेजारील राज्यातून चोरीछुप्या आणतो आणि शहरातील व्यापाऱ्यांना रात्री व पहाटेच्या वेळी पोच करीत असल्याचे तपासातून समोर आले आहे.
पोलिस आयुक्त अंकुश शिंदे, परिमंडळ दोनचे उपायुक्त चंद्रकांत खांडवी यांच्या मार्गदर्शनाखाली उपनगरचे वरिष्ठ पोलिस निरीक्षक अशोक शरमाळे व त्यांचे पथक गुन्ह्याचा तपास करीत आहेत.