नाशिक (प्रतिनिधी): गंगापूर धरण पंपिंग स्टेशन येथे होणारा वीजपुरवठा तब्बल साडेचार तासांनंतर सुरळीत करण्यात आल्याने शनिवारी (दि. ५) पाणीपुरवठा सुरळीत सुरू होईल, असे मनपाच्या पाणीपुरवठा विभागाच्या वतीने सांगण्यात आले. शुक्रवारी शहरात काही ठिकाणी सकाळचा पाणीपुरवठा झाला नाही, त्यामुळे नागरिकांचे विशेषतः महिलावर्गाचे हाल झाले.
इंदिरानगर परिसरातील इच्छामणीनगर भागात गेल्या आठवड्यापासून अत्यंत कमी दाबाने आणि कमी वेळ पाणीपुरवठा होतो आहे. अवकाळी पावसामुळे १३२ के. व्ही. सातपूर फीडर सबस्टेशनमध्ये बिघाड झाल्यामुळे महावितरणकडून शुक्रवारी (दि. ४) युद्धपातळीवर दुरुस्तीचे काम हाती घेण्यात आले होते.
त्यामुळे गंगापूर धरण येथून होणारा पाणीपुरवठा पंपिंग करणे शक्य झाले नसल्याने शहराचा सकाळच्या वेळी होणारा पाणीपुरवठा बंद ठेवण्यात आला होता. गंगापूर धरण पंपिंग स्टेशन येथे महावितरण कंपनीकडील १३२ के.व्ही. सातपूर व महिंद्रा या दोन फीडरवरून ३३ केव्हीएचटी वीजपुरवठा घेण्यात आलेला असून, सदर पंपिंगद्वारे मनपाचे बारा बंगला, शिवाजीनगर, पंचवटी, निलगिरी बाग, गांधीनगर व नाशिकरोड जलशुद्धीकरण केंद्र यांना रॉ. वॉटरचा पुरवठा करण्यात येतो.
