नाशिक (प्रतिनिधी): एवढे जोरात का बोलतो अशी कुरापत काढून बोरगड भागात टोळक्याने एकास बेदम मारहाण केल्याची घटना घडली. या घटनेत दगड फेकून मारण्यात आल्याने ४५ वर्षीय व्यक्ती जखमी झाला असून, याप्रकरणी चार जणांविरूध्द म्हसरूळ पोलिस ठाण्यात गुन्हा दाखल करण्यात आला आहे.
गोपाळ जाधव,विचू उर्फ चोर,शुभम बनकर व तुषार जाधव अशी मारहाण करणा-या संशयितांची नावे आहेत. याबाबत सुनिल जगन्नाथ बनसोडे (४५ रा.ओमकारनगर गणपती मंदिरामागे लामखेडे मळा) यांनी तक्रार दाखल केली आहे.
बनसोडे शुक्रवारी (दि.१५) बोरगड भागात गेले होते. सायंकाळच्या सुमारास ए.टी.पवार आश्रम शाळेजवळील किराणा दुकानात ते गप्पा मारत उभे असतांना ही घटना घडली.
संशयितांनी एवढे जोरात का बोलतो अशी कुरापत काढून बनसोडे यांना शिवीगाळ केली. यावेळी ते समजून सांगण्याचा प्रयत्न करीत असतांना टोळक्याने त्यांना दमदाटी करीत लाथाबुक्यांनी बेदम मारहाण केली. यावेळी एकाने त्यांना दगड फेकून मारल्याने ते जखमी झाले असून अधिक तपास हवालदार फुगे करीत आहेत.
