नशिक। दि. २३ ऑगस्ट २०२६: ग्रामीण व दुर्गम भागातील नागरिकांना उपचारासाठी दूरवर जावे लागू नये, यासाठी स्थानिक पातळीवरच सक्षम आरोग्य सुविधा उपलब्ध करून देणे आवश्यक आहे. त्यादृष्टीने आरोग्य केंद्रा मध्ये आवश्यक त्या सुविधा, मनुष्यबळ व वैद्यकीय साधनसामग्री उपलब्ध करून देण्यास कटिबंध असल्याचे प्रतिपादन राज्याचे सार्वजनिक आरोग्य व कुटुंब कल्याण मंत्री प्रकाश आबिटकर यांनी केले.
सार्वजनिक आरोग्य मंत्री श्री. आबिटकर यांनी ग्रामीण रुग्णालय सुरगाणा येथे भेट देत पाहणी केली,यावेळी ते बोलत होते. यावेळी आमदार नितीन पवार,आरोग्य उपसंचालक डॉ. कपिल आहेर, जिल्हा शल्यचिकित्सक डॉ. सतीश शिंपी, जिल्हा आरोग्य अधिकारी डॉ. सुधाकर मोरे,निवासी वैद्यकीय अधिकारी संदीप सूर्यवंशी, डॉ. आनंद पवार,सुरगाणा ग्रामीण रुग्णालयाचे वैद्यकीय अधीक्षक डॉ.संदीप चौधरी, वैद्यकीय अधिकारी डॉ .सचिन वानखेडे यांच्यासह संबंधित अधिकारी, परिचारिका, आरोग्य कर्मचारी उपस्थित होते. यावेळी मंत्री श्री. आबिटकर यांनी रुग्णालयातील रुग्णांशी संवाद साधत त्यांची आस्थेवाईकपणे चौकशी केली.
मंत्री श्री. आबिटकर म्हणाले की, आरोग्य संस्थांमध्ये स्वच्छता, रुग्णसेवा, औषधांची उपलब्धता आणि वैद्यकीय उपकरणांची कार्यक्षमता याबाबत विशेष दक्षता घेण्याच्या सूचना त्यांनी संबंधित अधिकाऱ्यांना दिल्या. नागरिकांना शासनाच्या आरोग्य योजनांचा अधिकाधिक लाभ मिळवून देण्यासाठी आरोग्य विभागातील अधिकारी व कर्मचाऱ्यांनी समन्वयाने काम करावे, असेही त्यांनी निर्देशित केले.
मंत्री श्री. आबिटकर यांनी सुरगाणा येथील ग्रामीण रुग्णालयांची पाहणी करताना बाह्यरुग्ण विभाग, आंतररुग्ण विभाग, प्रसूती विभाग, प्रयोगशाळा, औषध भांडार, रुग्ण कक्ष आदी सुविधांची प्रत्यक्ष पाहणी केली. रुग्णालयात उपचारासाठी येणाऱ्या नागरिकांना वेळेत व दर्जेदार आरोग्य सेवा मिळत आहेत का, याबाबत त्यांनी वैद्यकीय अधिकारी व कर्मचाऱ्यांकडून माहिती जाणून घेतली.यावेळी त्यांनी रुग्णालयातील विविध विभाग, उपलब्ध वैद्यकीय सुविधा, औषधसाठा, वैद्यकीय उपकरणे तसेच रुग्णांना देण्यात येणाऱ्या उपचार सेवांची माहिती घेतली.
रुग्णालयास स्त्रीरोग तज्ञ, भूल तज्ञ डॉक्टर तसेच सोनोग्राफी मशीन, रुग्णवाहिका आदी आवश्यक सुविधा उपलब्ध करून द्यावी, अशी मागणी आमदार नितीन पवार यांनी मंत्री श्री आंबिटकर यांच्याकडे केली. याबाबत मंत्री श्रीआंबिटकर आरोग्य सुविधांच्या बळकटीकरणाबाबत आवश्यक त्या उपाययोजना करण्यासाठी सर्वतोपरी प्रयत्न करण्यात येतील, असे त्यांनी यावेळी सांगितले.
यावेळी 3० खाटांच्या ग्रामीण रुगालय व सुरगाणाचे ५० खाटांच्या उपजिल्हा रुग्णालयामध्ये श्रेणीवर्धन झाल्याने अतिरिक्त २० खाटांच्या इमारतीच्या बांधकामाचे भुमिपुजन मंत्री श्री. आबिटकर यांच्या हस्ते करण्यात आले.
