नाशिक। दि. २० ऑगस्ट २०२६: मुंबई नाका परिसरातील एका भाड्याच्या बंगल्यात सुरू असलेल्या कथित देहविक्रीच्या व्यवसायाचा अनैतिक मानवी वाहतूक प्रतिबंधक कक्षाने पर्दाफाश केला. पोलिसांनी छापा टाकून एका महिलेची सुटका केली असून, या प्रकरणातील एका संशयिताला ताब्यात घेण्यात आले आहे. तर त्याचा साथीदार पोलिसांच्या कारवाईची चाहूल लागताच फरार झाला.
मुंबई नाका परिसरातील एका बंगल्यात देहविक्रीचा व्यवसाय सुरू असल्याची गोपनीय माहिती पोलिसांना मिळाली होती. त्यानंतर अनैतिक मानवी वाहतूक प्रतिबंधक कक्षाच्या पथकाने साध्या वेशात सापळा रचून संबंधित ठिकाणी कारवाई केली. या कारवाईत कृष्णकुमार सीताराम यादव (२६, रा. कुटे मार्ग) आणि संजय विजय शर्मा (रा. अशोका मार्ग) यांच्याविरुद्ध गुन्हा दाखल करण्यात आला आहे.
गुन्हे शाखेचे उपायुक्त किरणकुमार चव्हाण आणि सहायक पोलिस आयुक्त संदीप मिटके यांच्या मार्गदर्शनाखाली ही कारवाई करण्यात आली. अनैतिक मानवी वाहतूक प्रतिबंधक कक्षाचे सहायक पोलिस निरीक्षक विश्वास चव्हाणके, पोलिस उपनिरीक्षक सुवर्णा महाजन यांच्यासह शेरखान पठाण, गणेश वाघ, प्रजित ठाकूर, वैशाली घरटे, लीला सुकटे आदींच्या पथकाने पंच आणि सामाजिक संस्थेच्या स्वयंसेवकांच्या उपस्थितीत बंगल्यावर छापा टाकला.
कारवाईदरम्यान बंगल्याबाहेर फिटनेस क्लबचा फलक लावण्यात आल्याचे पोलिसांच्या निदर्शनास आले. या प्रकरणी मुंबई नाका पोलिस ठाण्यात संबंधित संशयितांविरुद्ध गुन्हा दाखल करण्यात आला असून, फरार संशयिताचा शोध सुरू आहे.
