नाशिक। दि. ८ जानेवारी २०२६: शहर व परिसरात गेल्या काही दिवसांपासून थंडीचा जोर ओसरल्याचे चित्र होते. उत्तरेकडून येणाऱ्या थंड वाऱ्यांचा प्रभाव कमी होणे आणि ढगाळ हवामान यामुळे गारवा कमी जाणवत होता. मात्र आज (दि. ८) पहाटेपासून वातावरणात पुन्हा बोचरी थंडी जाणवू लागली.
गेल्या २४ तासांत किमान तापमानात २.७ अंश सेल्सिअसची घसरण नोंदविण्यात आली. मागील दिवसांत किमान तापमान १४.९ अंशांपर्यंत वाढले होते, तर कमाल तापमानही सुमारे २८ अंशांपर्यंत पोहोचल्याने थंडीचा प्रभाव लोप पावला होता. आज सकाळी ढगांचा अडथळा नसल्याने तापमान वेगाने खाली येत १० अंश सेल्सिअसपर्यंत घसरले.
आर्द्रतेच्या प्रमाणातही घट झाली असून मंगळवारीच्या तुलनेत आज ६६ टक्के आर्द्रता नोंदविण्यात आली. सकाळच्या वेळेत काही भागांत हलके धुके पसरलेले दिसून आले, तर दिवसा उन्हाचा चटका जाणवत आहे. सध्या थंडीपासून मिळालेला दिलासा संपत असून येत्या दोन दिवसांत पुन्हा कडाक्याची थंडी वाढण्याची शक्यता वर्तविण्यात येत आहे.
