नाशिक। दि. ३० नोव्हेंबर २०२५: राज्य निवडणूक आयोगाकडून जिल्ह्यातील 11 नगरपरिषदांचा स्थानिक सार्वत्रिक निवडणूक कार्यक्रम जाहिर झाला असून यासाठी 2 डिसेंबर 2025 रोजी मतदान होणार आहे. या निवडणुकीकरिता मतदान करताना मतदान केंद्रांवर मतदारांची ओळख पटविण्यासाठी जे मतदार ओळखपत्र (EPIC) सादर करु शकत नाहीत, अशा मतदारांना त्यांची ओळख पटविण्यासाठी मतदार ओळखपत्राच्या (EPIC) व्यतिरिक्त 12 कागदपत्रे पुरावा म्हणून ग्राह्य असल्याचे निवडणूक आयोगाने कळविले आहे.
मतदान केंद्राध्यक्षाने मतदारास आपली ओळख पटविण्याकरिता प्रथम फोटो असलेले निवडणूक ओळखपत्र सादर करण्यास सांगावे. असे ओळखपत्र मतदाराकडे उपलब्ध नसल्यास किंवा त्यावरून मतदाराची ओळख पटत नसल्यास खालील 12 पुरव्यांपैकी कोणताही एक पुरावा सादर करण्याची सूचना मतदान केंद्राध्यक्ष मतदारास करेल व त्यानुसार मतदाराची ओळख पटल्यांनतर मतदारास मतदान करता येईल.
असे आहेत अन्य 12 पुरावे:
- भारताचा पासापोर्ट
- आधार ओळखपत्र
- वाहन चालविण्याचा परवाना
- आयकर विभागाकडील पॅन ओळखपत्र
- केंद्रशासन/ राज्य शासन/ सार्वजनिक उपक्रम/ स्थानिक स्वराज्य संस्था यांनी आपल्या कर्मचाऱ्यांना दिलेली ओळखपत्रे
- राष्ट्रीयकृत बँका अथवा पोस्ट ऑफीस यामधील खातेदाराचे फोटो असणारे पासबुक
- सक्षम प्राधिकाऱ्याने दिलेला फोटोसहित अपंगत्वाचा दाखला.
- राष्ट्रीय ग्रामीण रोजगार हमी योजनेखालील फोटो असलेले ओळखपत्र (MNREGA) जॉब कार्ड
- निवृत्त कर्मचाऱ्यांची अथवा त्यांच्या विधवा/अवलंबित व्यक्ती यांची फोटो असलेली निवृती वेतन विषयक कागदपत्रे उदा. पासबुक, प्रमाणपत्र इत्यादी
- लोकसभा/ राज्यसभा सचिवालय तसेच विधानसभा/ विधानपरिषद/ सचिवालय यांनी आपल्या सदस्यांना दिलेले अधिकृत ओळखपत्र
- स्वातंत्र्य सैनिकाचे फोटो असलेले ओळखपत्र
- केंद्र शासनाच्या श्रम मंत्रालयाने दिलेले आरोग्य विमा योजनेचे फोटोसहित कार्ड. इत्यादी कागदपत्रे पुरावा म्हणून ग्राह्य धरण्याबाबत निवडणूक आयोगाने कळविले आहे.
