नाशिक (प्रतिनिधी): पाणी पिण्याच्या बहाण्याने आलेल्या इसमाने वृद्धेला खाली पाडून पाय बांधून मारहाण करत गळ्यातील ७५ हजारांचे सोन्याचे दागिने लुटून नेले. संजीवनगर, अंबड लिंक रोड येथे हा प्रकार घडला. याप्रकरणी एमआयडीसी पोलिस चौकी व अंबड पोलिस ठाण्यात गुन्हा दाखल करण्यात आला आहे.
पोलिसांनी दिलेली माहिती आणि प्रगती गुंजाळ यांनी दिलेल्या तक्रारीनुसार, दुपारी ४ वाजता सासू राधाबाई गुंजाळ (७०) या घरात एकट्या असताना सावळ्या रंगाचा अंदाजे ४५ वर्षे वयाचा आकाशी रंगाचा हाफ शर्ट, काळी हाफ पॅन्ट घातलेला व थोडेसे टक्कल पडलेला, हातात काळी छत्री असलेल्या इसमाने घराबाहेर उभे राहून पिण्यास पाणी मागितले. वृद्धा पाणी आणण्यास जात असताना घरात घुसून तिला खाली पाडून मारहाण केली. तिचे पाय बांधून गळ्यातील एकूण ७५ हजार रुपयांचे सोन्याचे दागिने लुटून नेले. याप्रकरणी वरिष्ठ पोलिस निरीक्षक मनोहर कारंडे तपास करत आहेत. (अंबड पोलीस स्टेशन, गुन्हा रजिस्टर क्रमांक: ५६४/२०२४)
