नाशिक (प्रतिनिधी): नानावली भागात ट्रक घरात घुसून दोन घर आणि एक दुचाकीचे नुकसान होऊन एक जण जखमी झाल्याची घटना शुक्रवारी (ता.११) दुपारी अडीच वाजता घडली.
याप्रकरणी भद्रकाली पोलिस ठाण्यात ट्रकचालकाविरुद्ध गुन्हा दाखल करण्यात आला आहे. चालक फरार असून, पोलिस शोध घेत आहे.
भंगारचा ट्रक (पीबी- १२- एम- ९८७३) घरात घुसल्याने भीमा गवळी किरकोळ जखमी झाले आहे. श्री. गवळी यांच्या अंगावर पत्रे पडले. लाकडास पत्रे अडकून असल्याने ते बचावले. तर अन्य कुटुंबीय वरच्या मजल्यावर झोपले असल्याने दुर्घटना टळली.
श्रावण गांगुर्डे आणि भीमा गवळी यांच्या घरांचे नुकसान झाले आहे. चालकाचे नियंत्रण सुटले आणि बारा चाकी ट्रक वीज खांब तोडून घरात घुसला. मोठा आवाज झाल्याने परिसरातील नागरिकांमध्ये भीती निर्माण झाली.
ट्रकने दुचाकीला (एमएच- १५- एफजी- २१६५) धडक दिली. त्यात दुचाकीचे मोठे नुकसान झाले आहे. भीतीपोटी चालकाने ट्रक सोडून घटनास्थळावरून पळ काढला. श्री. गांगुर्डे यांच्या तक्रारीवरून ट्रकचालकाविरुद्ध गुन्हा दाखल करण्यात आला आहे.
