🔴 नाशिककरांनो सावधान! ‘ट्रिपल सीट’ फिराल तर आता होणार ही कठोर कारवाई…

नाशिकच्या सर्व अपडेट्ससाठी आमचा व्हॉट्सअ‍ॅप ग्रुप जॉईन करा…

नाशिक (प्रतिनिधी): शहरातील बेशिस्त वाहनचालकांना चाप लावण्यासाठी वाहतूक पोलिसांनी दंडात्मक कारवाईला सुरुवात केल्यानंतर त्याचे स्वरूप अधिक कठोर करण्याचा निर्णय घेण्यात आला आहे. त्यानुसार ‘ट्रिपल सीट’ फिरणाऱ्यांची दुचाकी थेट पोलिस ठाण्यात जप्त करण्याचे विचाराधीन आहे.

यासंदर्भात लवकरच बैठक घेऊन अंतिम निर्णयाअंती अंमलबजावणीला सुरुवात होणार आहे. यासह नववर्ष स्वागताच्या पार्श्वभूमीवर बेशिस्तांवरील कारवाईत वाढ केल्याचेही पोलिसांनी स्पष्ट केले आहे.

शहरात बेशिस्त वाहनचालकांमुळे वाहतूक कोंडीसह अपघात वाढत आहेत. त्यामुळे पोलिस आयुक्तालयातील वाहतूक शाखेने काही दिवसांपासून प्रबोधनासह बेशिस्तांवर दंडात्मक कारवाई सुरू केली आहे.

पोलिस आयुक्त संदीप कर्णिक यांच्या आदेशान्वये, वाहतूक उपायुक्त चंद्रकांत खांडवी आणि सहायक आयुक्त डॉ. सचिन बारी यांनी पथकांना नववर्ष स्वागत पार्श्वभूमीवर ‘ड्रंक अँड ड्राइव्ह’सह इतर कारवाई करण्याचे निर्देश दिले आहेत.

त्याच दरम्यान ‘ट्रिपल सीट’ फिरणाऱ्यांवर कठोर कारवाई करण्याचेही आयुक्तालयाच्या विचाराधीन आहे. त्यानुसार यापुढे ट्रिपल सीट फिरणाऱ्यांची वाहने जप्त करण्यात येणार आहेत. यापूर्वी काही वर्षांपासून या स्वरूपाची धडक कारवाई पोलिसांनी केली होती.

त्यावेळी बऱ्यापैकी चालकांना शिस्त लागली होती. दरम्यान, शहरात गत दहा दिवसांत २ हजार २४४ विनाहेल्मेट दुचाकीस्वारांना दंड करण्यात आला आहे. यासह ६१३ चालक राँगसाइड, तर २१५ दुचाकीवरील प्रवासी ट्रिपल सीट असल्याने कारवाई करण्यात आली.

कारवाईअंतर्गत शहरातील बेशिस्त वाहनचालकांना १६ लाख २९ हजार २०० रुपयांचा दंड ठोठावण्यात आला. या स्वरूपाची कारवाई पुढेही सुरू राहणार असल्याने नागरिकांनी नियमांचे पालन करण्याची सूचना वाहतूक पोलिसांनी केली आहे.

नववर्ष स्वागताच्या पार्श्वभूमीवर ड्रंक अँड ड्राइव्ह, रॅश ड्रायव्हिंग, ट्रिपल सीट कारवाईत वाढ केली आहे. पुढील टप्प्यात वाहनचालकांना शिस्त लावण्यासाठी दुचाकी तात्पुरती जप्त करण्याची कारवाई प्रस्तावित करीत आहोत. याबाबत अंमलबजावणीचा निर्णय लवकरच घेण्यात येईल.- डॉ. सचिन बारी, सहायक पोलिस आयुक्त, वाहतूक