नाशिक। दि. २१ जानेवारी २०२६: नाशिक–त्र्यंबकेश्वर सिंहस्थ कुंभमेळा २०२७ च्या पार्श्वभूमीवर शहर सौंदर्यीकरण, सुशोभीकरण व नागरी रचना विषयक कामे तज्ज्ञ मार्गदर्शनाखाली, नियोजनबद्ध व सांस्कृतिक संवेदनशीलतेने राबविण्यासाठी नाशिक त्र्यंबकेश्वर कुंभमेळा प्राधिकरण अंतर्गत, शहर सुशोभीकरणासाठी, तांत्रिक सल्लागार समिती स्थापन करण्यात आली आहे.
कुंभमेळ्याच्या काळात लाखो भाविक नाशिक व त्र्यंबकेश्वर येथे दाखल होणार असल्याने, शहराचे सौंदर्य, पर्यावरणीय संतुलन व सांस्कृतिक ओळख जपत, विकास करण्याच्या दृष्टीने हा निर्णय घेण्यात आला आहे.
स्थापना करण्यात आलेल्या तांत्रिक सल्लागार समितीचे अध्यक्षपद, पर्यावरणीय लँडस्केप तज्ज्ञ व लँडस्केप आर्किटेक्ट, डॉ. प्राजक्ता बस्ते, यांच्याकडे देण्यात आले आहे. समितीमध्ये सांस्कृतिक वारसा अभ्यासक, दिनेश वैद्य, स्पर्शनीय व अमूर्त वारसा क्षेत्रातील तज्ज्ञ व संवर्धन वास्तुविशारद, समृद्ध मोगल, तसेच कलाकार प्रफुल सावंत यांचा समावेश आहे. विविध क्षेत्रातील तज्ज्ञांचा सहभाग असल्यामुळे शहर सुशोभीकरणाच्या कामांमध्ये पर्यावरण, वारसा संवर्धन, कार्यक्षम शहरी रचना व सौंदर्यदृष्टी, यांचा समतोल राखला जाणार आहे.
समिती, कुंभमेळा प्राधिकरण व त्यांच्यावतीने नेमण्यात आलेल्या, सल्लागार संस्थांना संकल्पना मांडणी, आराखडा तयार करणे, नियोजन, निविदा प्रक्रिया व अंमलबजावणी या सर्व टप्प्यांवर तांत्रिक मार्गदर्शन व परीक्षण करणार आहे. समितीच्या कार्यकक्षेत गोदावरी नदीकाठावरील घाटांचे सुशोभीकरण व मजबुतीकरण, प्रमुख प्रवेश मार्ग व रस्त्यांचे सौंदर्यीकरण, महत्त्वाच्या चौकांचे शहरी लँडमार्क म्हणून विकास, उड्डाणपूल व पुलांचे सौंदर्यात्मक सुधारणा यांचा समावेश आहे.
सोबतच दिशादर्शक फलक व बहुभाषिक सूचना प्रणाली, घाट, सार्वजनिक जागा व वारसास्थळांचे प्रकाशयोजन, साधुग्राम परिसराचे सौंदर्यीकरण, ‘पेंट माय सिटी’सारख्या उपक्रमांतर्गत, भित्तीचित्रे, दर्शनी भागांचे रंगकाम व सार्वजनिक कला प्रकल्प, शहरातील उद्याने, हरित पट्ट्यांचे व विश्रांतीस्थळांचे नियोजन, तसेच कुंभमेळा मुख्य परिसरासह ५० किलोमीटर परिसरातील महत्त्वाच्या वारसास्थळांचे संवर्धन याबाबत समिती मार्गदर्शन करणार आहे. नाशिकच्या कुंभमेळ्याशी निगडित विधी, परंपरा, लोककला, संगीत व मौखिक परंपरांचे दस्तऐवजीकरण व सादरीकरण यावरही भर दिला जाणार आहे.
कुंभमेळा प्राधिकरण आयुक्त आयुक्त शेखर सिंह यांनी सांगितले, “सिंहस्थ कुंभमेळा हा एक जागतीक स्तरावरील धार्मिक सोहळा आहे, यामुळेच सांस्कृतिक, ऐतिहासिक व जागतिक दर्जाची नाशिक व त्र्यंबक शहर घडविण्याची संधी आहे. तांत्रिक सल्लागार समितीच्या माध्यमातून शहर सुशोभीकरणाची कामे स्थानिक संदर्भ, पर्यावरणीय शाश्वत आणि दीर्घकालीन उपयोग लक्षात घेऊन राबविली जातील, जेणेकरून भाविक व नागरिकांना सुरक्षित, सुसज्ज आणि संस्मरणीय अनुभव मिळेल.”
