दोन दिवसांत जिल्ह्यातील 18 ते 44 वयोगटातील 598 नागरिकांचे लसीकरण !

नाशिक (प्रतिनिधी): जिल्ह्यात 5 लसीकरण केंद्रांवर 18 ते 44 वयोगटातील नागरिकांचे लसीकरण महाराष्ट्र दिन व कामगार दिनापासून सुरू झाले असून दोन दिवसात या लसीकरण केंद्रावर 598 नागरीकांनी लसीकरण घेतले असून जोपर्यंत लसींचा साठा उपलब्ध असेल तोपर्यंत हे लसीकरण 7 दिवस सुरू राहील, अशी माहिती जिल्हाधिकारी सूरज मांढरे यांनी दिली आहे.

corona nashik news

ही आहेत 18 ते 44 वयोगटासाठीची लसीकरण केंद्रे:
1 मे या महाराष्ट्र दिन व कामगार दिनाचे औचित्य साधून राज्यात 18 ते 44 वयोगटातील नागरिकांचे प्रातिनिधीक स्वरूपात मोफत लसीकरण सुरू करण्यात आले आहे. यात नाशिक जिल्ह्यातील नाशिक महानगरपालिका क्षेत्रात दोन, नाशिक ग्रामीण क्षेत्रात दोन तर मालेगाव महानगरपालिका क्षेत्रात एक केंद्र सुरू करण्यात आले आहेत. प्रत्येक लसीकरण केंद्राला 2 हजार  प्रमाणे 10 हजार लस स्वतंत्रपणे जिल्ह्यात उपलब्ध करून दिलेल्या आहेत. पुढील 7 दिवस लस संपेपर्यंत लसीकरण चालू ठेवण्यात येणार आहेत.

नाशिक महानगरपालिका कार्यक्षेत्रात इंदिरा गांधी रूग्णालय, पंचवटी कारंजा व नाशिक रोड नागरी प्राथमिक आरोग्य केंद्र,  नाशिक ग्रामीण क्षेत्रात मोहाडी प्राथमिक आरोग्य केंद्र (दिंडोरी) व पिंपळगाव बसवंत प्राथमिक आरोग्य केंद्र, निफाड तर मालेगाव महानगरपालिका क्षेत्रातील शहरी आरोग्य केंद्र निमा येथे ही लसीकरण केंद्र सुरू करण्यात आली असल्याची माहिती जिल्हाधिकारी सूरज मांढरे यांनी दिली आहे.

दोन दिवसात झाले 598 नागरिकांचे लसीकरण
1 मे रोजी पहिल्याच दिवशी 276 नागरिकांनी  लसीकरण केले असून त्यात नाशिक महानगरपालिका कार्यक्षेत्रात इंदिरा गांधी रूग्णालयात 90, शहरी प्राथमिक आरोग्य केंद्र, नाशिक रोड येथे 95 तर नाशिक ग्रामीण भागात मोहाडी प्राथमिक आरोग्य केंद्र(दिंडोरी) येथे 28 पिंपळगाव बसवंत प्राथमिक आरोग्य केंद्र (निफाड) येथे 49 इतके तर मालेगाव महानगरपालिका क्षेत्रातील शहरी आरोग्य केंद्र निमा येथे 14 इतके असे जिल्ह्यातील एकूण 276 नागरिकांचे लसीकरण झाले आहे.

तसेच 2 मे रोजी दुसऱ्या दिवशी 322 नागरिकांनी लसीकरण केले असून त्यात नाशिक महानगरपालिका कार्यक्षेत्रात इंदिरा गांधी रूग्णालयात 87, शहरी प्राथमिक आरोग्य केंद्र, नाशिक रोड 71 तर नाशिक ग्रामीण भागात मोहाडी प्राथमिक आरोग्य केंद्र(दिंडोरी) येथे 84, पिंपळगाव बसवंत प्राथमिक आरोग्य केंद्र (निफाड) येथे 80 इतके लसीकरण झाले आहे.  यानुसार जिल्ह्यातील लसीकरण केंद्रावर एकूण 322 नागरिकांचे लसीकरण झाले आहे. दोन दिवसात जिल्ह्यातील 18 ते 44 वयोगटातील 598 नागरिकांनी लसीकरण करून घेतले आहे.

The Title "Nashik Calling" is approved by Office Of The Registrar Of Newspapers For India (Ministry Of Information And Broadcasting). RNI: MAHMAR51790