नाशिक। दि. ५ डिसेंबर २०२५: नोंदणी व मुद्रांक विभागाच्या सुधारित आकृतीबंधास मंजूरी प्रदान करण्याबाबतचा महसूल मंत्री चंद्रशेखर बावनकुळे यांच्या मार्गदर्शनाखाली महसूल व वन विभागाचा शासन निर्णय आज निर्गमित करण्यात आला आहे. सुधारित आकृतीबंधानुसार सद्यस्थितीत मंजूर पदांची संख्या 3 हजार 958 झाली आहे. अशी माहिती नोंदणी महानिरिक्षक रविंद्र बिनवडे यांनी दिली असल्याचे सह जिल्हा निबंधक वर्ग 1, नाशिक संदीप आहेर यांनी प्रसिद्धी पत्रकान्वये कळविले आहे.
राज्याचे मुख्य सचिव व अपर मुख्य सचिव (महसूल, मुद्रांक शुल्क व नोंदणी) यांच्या प्रयत्नाने विभागाच्या सध्या मंजूर 3 हजार 94 पदांपैकी 107 पदे निरसित करण्यात आली आहेत तसेच त्यामध्ये 965 पदे नव्याने निर्माण करून एकूण 3 हजार 958 पदांच्या सुधारित आकृतीबंधास महसूल व वन विभागाच्या 4 डिसेंबर 2025 रोजीच्या शासन निर्णयाद्वारे मंजुरी प्रदान करण्यात आली आहे.
विभागातील नवीन दुय्यम निबंधक कार्यालयाच्या निर्मितीमुळे व दस्त संख्या तसेच इतर कामकाजामध्ये झालेली व्यापक वाढ लक्षात घेता सुधारित आकृतीबंधामुळे विभाग अधिक सक्षम व बळकट होईल. तसेच पर्याप्त मनुष्यबळामुळै शासनाकडून दरवर्षी देण्यात येणाऱ्या इष्टांक पूर्तीसाठी मदत होऊन महसूलात वाढ होणार आहे व पर्यायाने नागरिकांना अधिक चांगल्या सेवा देण्याचा नोंदणी व मुद्रांक विभागाचा मानस सफल होण्यास मदत होणार असल्याचेही नोंदणी महानिरिक्षक श्री बिनवडे यांनी कळविले आहे.
