नाशिक। दि. ७ एप्रिल २०२६: घरपट्टी आणि पाणीपट्टीचे इंडेक्स क्रमांक अद्ययावत करण्याच्या नावाखाली नागरिकांना नाशिक महापालिकेच्या नावाने बनावट व्हॉट्सअॅप मेसेज पाठवून फसवणूक करण्याचा प्रकार उघडकीस आला आहे. या प्रकरणाची गंभीर दखल घेत महानगरपालिकेने तातडीने कारवाई करत संबंधित भामट्यांविरोधात सायबर पोलिस ठाण्यात गुन्हा नोंदवला आहे.
मागील काही दिवसांत नागरिकांच्या मोबाईलवर नाशिक महानगर पालिकेचा अधिकृत लोगो वापरून 6005481746, 6297019792 या अनोळखी व्हॉट्सअप क्रमांकावरून इंग्रजी भाषेत ‘शहरातील नागरीकांची प्रलंबित पाणीपट्टी व घरपट्टी बिले भरली नसल्याने, त्यांचे कनेक्शन खंडीत करण्यात येईल तसेच बिले अपडेट करण्यासाठी हेल्पलाईन 6297019792 अंकित अग्रवाल यांचेशी संपर्क करण्याची धमकीवजा मॅसेज शहरातील नागरिकांमध्ये प्रसारित करण्यात आला.
यामुळे नागरिकांमध्ये भितीचे वातावरण तयार झाले. दोन्ही व्हॉट्सअपधारकांने नाशिक महानगरपालिकेची ओळख चोरून, पालिकेचा अधिकृत लोगोचा व्हॉट्सअपच्या डिपी वापरून, खोटा संदेश पसरविल्याने, दोन्ही व्हॉट्सअपधारकविरूध्द महापालिकेने सायबर पोलीस ठाण्यात तक्रार दिली आहे.
