नाशिक: दुचाकीच्या धडकेत जखमी झालेल्या महिलेचा उपचारादरम्यान मृत्यू

नाशिक (प्रतिनिधी): भरधाव दुचाकीस्वाराने पाठीमागून धडक दिल्यामुळे गंभीर मार लागलेल्या महिलेचा मृत्यू झाल्याची नोंद पोलीस ठाण्यात करण्यात आली आहे.

श्वेताली नीलेश खैरे (वय ३३, रा. मित्रविहार कॉलनी, रुक्मिणी लॉन्सजवळ, नाशिक) ही विवाहित महिला दि. ६ फेब्रुवारी रोजी रुक्मिणी लॉन्सजवळून पायी जात होती. त्यावेळी पाठीमागून भरधाव आलेल्या मोटारसायकल-स्वाराने या महिलेला जोराची धडक दिली. त्यात त्यांच्या दोन्ही पायांना मार लागला होता. त्यांचे पती नीलेश खैरे यांनी या महिलेला शताब्दी हॉस्पिटल्स येथे उपचारासाठी दाखल केले होते. उपचार सुरू असताना श्वेताली खैरे यांचा मृत्यू झाला. या प्रकरणी आडगाव पोलीस ठाण्यात आकस्मिक मृत्यूची नोंद करण्यात आली आहे. पुढील तपास सहाय्यक पोलीस उपनिरीक्षक जाधव करीत आहेत.