कमाल तापमान ३५.५ अंशांवर; २० ऑक्टोबरनंतर काहीसा दिलासा मिळण्याची शक्यता
नाशिक। दि. १४ ऑक्टोबर २०२६: शहरात ऑक्टोबर हीटचा प्रभाव दिवसेंदिवस वाढत असून, गेल्या सात दिवसांपासून कमाल तापमानाचा पारा सातत्याने ३५ अंश सेल्सिअसच्या पुढे नोंदविला जात आहे. वाढत्या उष्णतेमुळे नाशिककर हैराण झाले असून, दिवसा उन्हाच्या तीव्र झळा आणि रात्रीच्या उकाड्यामुळे नागरिकांना अस्वस्थतेचा सामना करावा लागत आहे. मंगळवारी (दि. १३) शहरातील कमाल तापमान ३५.५ अंश सेल्सिअस नोंदविण्यात आले.
बुधवार (दि. ७) ते मंगळवार (दि. १३) या सलग सात दिवसांत कमाल तापमानात फारसा फरक पडलेला नाही. सकाळी आठ वाजल्यापासूनच उन्हाचा चटका जाणवू लागतो. दुपारच्या वेळी उन्हाची तीव्रता अधिक वाढत असल्याने नागरिकांना घराबाहेर पडणेही जिकिरीचे होत आहे. उन्हापासून बचाव करण्यासाठी नागरिक टोपी, छत्री आणि स्कार्फचा वापर करताना दिसत आहेत.
दरम्यान, मंगळवार (दि. २०) नंतर कमाल तापमानात घट होऊन उष्णतेपासून काहीसा दिलासा मिळण्याची शक्यता हवामान अभ्यासक माणिकराव खुळे यांनी व्यक्त केली आहे. तोपर्यंत आणखी आठवडाभर तापमानाचा पारा चढाच राहण्याची शक्यता आहे.
कमाल तापमान असे… (सेल्सि. मध्ये):
बुधवार (दि. ७) ३५.४, गुरुवार (८) ३५.६, शुक्रवार (दिनांक ९) ३५.७,शनिवार (दि. १०) ३५.४, रविवार (११ वा दिवस) ३५.०, सोमवार (दिवस १२) ३५.३, मंगळवार (दि. १३) ३५.५
