30 सप्टेंबरपर्यंत ई-पीक पाहणी करण्याचे शेतकऱ्यांना आवाहन
नाशिक, दि. २४ सप्टेंबर २०२५ (जिमाका वृत्तसेवा): खरीप हंगाम 2025 करीता शेतकरी स्तरावरून मोबाईल ॲपद्वारे ई-पीक पाहणी नोंदणीसाठी 30 सप्टेंबरपर्यंत मुदतवाढ देण्यात आली आहे. राज्यात काही ठिकाणी झालेली अतिवृष्टी, दुबार पेरणी या कारणांमुळे शेतकरी ई-पीक नोंदणी पूर्ण न करू शकल्यामुळे आणि ई-पीक नोंदणी करण्यापासून शेतकरी वंचित राहू नये यासाठी मुदतवाढ देण्यात आली आहे. जिल्ह्यात 19 सप्टेंबर 2025 पर्यंत शेतकरी स्तरावर 3 लाख 98 हजार 775 हेक्टर क्षेत्रावर ई-पीक पाहणी पूर्ण झाली असल्याची माहिती उपजिल्हाधिकारी (प्रशासन) तुकाराम हुलवळे यांनी दिली आहे.
जिल्ह्यातील नाशिक, सिन्नर, निफाड, दिंडोरी, त्र्यंबकेश्वर, कळवण, इगतपुरी, येवला, बागलाण, चांदवड, मालेगाव, देवळा, नांदगाव, पेठ व सुरगाणा या 15 तालुक्यात एकूण ई- पीक पाहणी करावयाच्या मालकी क्षेत्राची संख्या 13 लाख 23 हजार 484 इतकी असून त्यापैकी 19 सप्टेंबरपर्यंत पीक पाहणी नोंदविलेल्या मालकी क्षेत्राची संख्या 4 लाख 57 हजार 424 इतकी आहे. जिल्ह्यातील 15 तालुक्यात ई-पीक पाहणी करावयाचे एकूण क्षेत्र 11 लाख 3 हजार 82 हेक्टर इतके असून यापैकी शेतकरी स्तरावर 3 लाख 98 हजार 775 हेक्टर इतक्या क्षेत्रावर आतापर्यंत ई-पीक पाहणी झाली आहे.
जिल्ह्यातील जास्तीत जास्त शेतकऱ्यांनी आपल्या शेतातून डिजिटल क्रॉप सर्वे मोबाईल ॲपच्या माध्यामतून ई-पीक पाहणी 30 सप्टेंबर 2025 पर्यंत पूर्ण करावी व आपल्या हक्काचा लाभ निश्चित करावा, असे आवाहन जिल्हा प्रशासनाकडून करण्यात आले आहे.
