नाशिक: नवरात्रोत्सवानिमित्त शहरातील ‘या’ वाहतूक मार्गात आजपासून (दि. २२) महत्वाचे बदल !

नाशिक। दि. २२ सप्टेंबर २०२५: नवरात्रोत्सवात कालिका देवी मंदिराच्या परिसरात नऊ दिवसीय यात्रोत्सव भरतो. या पार्श्वभूमीवर वाहतुकीची कोंडी होऊ नये, यासाठी शहर वाहतूक नियंत्रण विभागाकडून वाहतूक मार्गात बदल करण्यात आला आहे. सोमवारपासून (दि. २२) ते २ ऑक्टोबरपर्यंत गडकरी चौक ते मुंबईनाका आणि चांडक सर्कल ते संदीप हॉटेल चौफुलीपर्यंतच्या मार्गावर तसेच जोड मार्गावर सर्व प्रकारच्या वाहनांना वाहतुकीसाठी प्रवेश बंद करण्यात येणार आहे.

जुन्या मुंबई-आग्रा महामार्गावर दरवर्षी नवरात्रात यात्रा भरते. यात्रेदरम्यान भाविकांची आणि वाहनचालकांची गैरसोय टाळण्यासाठी शहर वाहतूक नियंत्रण विभागाचे प्रमुख पोलिस उपायुक्त चंद्रकांत खांडवी यांनी अधिसूचना जारी केली आहे. या अधिसूचनेनुसार वरील मार्गावर सोमवारपासून पूर्ण वेळ वाहतूक बंद राहणार आहे. विजयादशमीपर्यंत हे निर्बंध लागू राहणार असल्याचे अधिसूचनेत म्हटले आहे.

वाहनचालकांनी पर्यायी मार्गाचा या काळात वापर करावा. कोणीही निर्बंधाचे उल्लंघन करू नये, अन्यथा कारवाई करण्यात येईल, असा इशारा देण्यात आला आहे.

यात्राकाळात शहरातील पर्यायी मार्ग असा…
👉 गडकरी चौक सारडा सर्कलमार्गे किंवा गडकरी चौक-एलआयसी-चांडक सर्कलमार्गे तुपसाखरे लॉन्स रस्त्याने पुढे मुंबईनाक्याकडे वाहने मार्गस्थ होतील.
👉 मायको सर्कलकडून राजा शिवाजी मार्गदर्शन केंद्र तिडके कॉलनी नंदिनी पुलावरून पुढे आरडी सर्कलवरून गोविंदनगर रस्त्याने इंदिरानगर बोगद्याकडे वाहने जातील.
👉 चांडक सर्कल येथून मुंबईनाक्याकडे जाणारी वाहतूक सरळ गडकरी चौक सिग्नलपर्यंत जाईल तेथून शिंगाडा तलावमार्गे पुढे द्वारकेकडे खाना होतील.
👉 सर्व एसटी बसेस, सिटी लिंक बसेससह अन्य वाहने ४ त्र्यंबकनाका सिग्नलवरून जिल्हा परिषदेसमोरून खडकाळी सिग्नल येथून सारडासर्कलमार्गे द्वारकेला जातील.
👉 मुंबईनाक्याकडून येणारी सर्व वाहने महामार्ग बसस्थानकाच्या बाहेरील टॅक्सी थांबा येथून तुपसाखरे लॉन्ससमोरून सरळ मायको सर्कलकडे जातील.
👉 अंबड-सातपूर एमआयडीसीमध्ये जाणारी जड/अवजड वाहने द्वारका येथून महामार्गाने थेट गरवारे चौकातून पुढे जातील.
👉 पंचवटीत जाणारी वाहतूक ही द्वारका येथून कन्नमवार पुलावरून पुढे रवाना होईल.
👉 सारडासर्कलकडून गडकरी चौकाकडे येणारी वाहने कृषी विभागाच्या कार्यालयाजवळून वळण घेत एन. डी. पटेल रस्त्याने साठे चौकातून त्र्यंबकनाका सिग्नलकडे जातील.

यात्रोत्सव काळात येणाऱ्या भाविकांनी उपरोक्त मार्गांचा वापर करावा, असे आवाहन पोलिसांनी केले आहे.