नाशिक (प्रतिनिधी): येथील कलानगर सिग्नलजवळ मैत्र विहार अपार्टमेंटच्या एका गाळ्यामध्ये वक्रतुंड पार्सल पॉईंट नावाचे दुकान आहे. या दुकानात सोमवारी (दि. १) गॅसगळती होऊन झालेल्या स्फोटात गंभीररीत्या भाजलेल्या दोघा इसमांचा उपचारदरम्यान मृत्यू झाला.
याप्रकरणी इंदिरानगर पोलिस ठाण्यात अकस्मात नोंद करण्यात आली आहे. कलानगर सिग्नलजवळ असलेल्या वक्रतुंड पार्सल पॉइंटमध्ये स्वयंपाकाच्या गॅस सिलिंडरमधून मध्यरात्रीनंतर गळती झाली. गाळ्यात गॅस साठवून राहिलेला असताना सकाळी सव्वानऊ वाजेच्या सुमारास दुकानात स्फोट झाला होता.
या वेळी दुकानमालक सुरेश नारायण लहामगे (५५, रा. वंदना पार्क, इंदिरानगर) व त्यांच्यासोबत असलेला रिक्षाचालक संदीप सखाराम कालेकर (३१, रा. शांतीनगर, मखमलाबाद) हे दोघेही भाजले होते.
त्यांना उपचारासाठी शासकीय जिल्हा रुग्णालयात दाखल करण्यात आले होते. गुरुवारी (दि.४) सकाळी लहामगे व कालेकर या दोघांना वैद्यकीय अधिकारी यांनी तपासून मयत घोषित केले.
