नाशिक: लाथाबुक्यांनी बेदम मारहाण करुन ४२ वर्षीय व्यक्तीचे अपहरण…

नाशिक (प्रतिनिधी): लाथाबुक्यांनी बेदम मारहाण करीत दुचाकीस्वारांनी एका ४२ वर्षीय व्यक्तीचे अपहरण केल्याची घटना पळसे ता.जि. नाशिक येथे घडली. याप्रकरणी नाशिकरोड पोलीस ठाण्यात अपहरणाचा गुन्हा दाखल करण्यात आला आहे.

पोलीसांनी दिलेल्या माहितीनुसार प्रभावती पुंडलीक बेलेकर (रा. शिवाजी उद्यान पेट्रोलपंपासमोर पळसे) यांनी याबाबत फिर्याद दिली आहे. बेलेकर यांचा पुतण्या योगेश सदाशिव बेलेकर (४२) याचे या घटनेत अपहरण करण्यात आले आहे. रविवारी (दि.१०) रात्री हा प्रकार घडला. योगेश बेलेकर हा रात्री आठच्या सुमारास घरात असतांना त्यास एक फोन आला होता. समोरच्या वक्तीकडून शिवीगाळ करण्यात आल्याने त्यानेही शिवीगाळ केली.

याबाबत पुतण्याकडे विचारपूस करीत असतांनाच दुचाकीवर दोन जण आले. त्यांनी योगेशला घराबाहेर बोलावून घेत लाथाबुक्यांनी बेदम मारहाण केली. तसेच आपल्या दुचाकीवर बळजबरीने बसवून त्यास पळवून नेल्याचा आरोप प्रभावती बेलेकर यांनी आपल्या फिर्यादीत केला आहे. अधिक तपास सहाय्यक निरीक्षक किरण कोरडे करीत आहेत. (नाशिकरोड पोलीस स्टेशन, गुन्हा रजिस्टर क्रमांक: ६०९/२०२४)