नाशिक: बिल्डिंगच्या सेंट्रिंगचे काम करतांना आठव्या मजल्यावरून पडल्याने मजुराचा मृत्यू

नाशिक (प्रतिनिधी): आठव्या मजल्यावर सेटिंगचे काम करताना खाली पडल्याने झालेल्या अपघातात मजूर ठार झाला. सातपूर एमआयडीसीत हा अपघात घडला.

याप्रकरणी सातपूर पोलिस ठाण्यात अकस्मात मृत्यूची नोंद करण्यात आली आहे. हेमराज अनंतकुमार (वय: २४, रा. गणेशनगर, सातपूर) असे ठार झालेल्या मजुराचे नाव आहे. पोलिसांनी दिलेली माहिती अशी, सातपूर एमआयडीसीत एका बांधकाम प्रकल्पावर इमारतीच्या आठव्या मजल्यावर सेटिंगचे काम सुरू असताना तेथे काम करणारा हेमराज अनंतकुमार याचा तोल गेल्याने तो खाली पडला. डोक्यास गंभीर मार लागल्याने तत्काळ सिव्हिलमध्ये दाखल केले. उपचारापूर्वीच डॉक्टरांनी त्यास मृत घोषित केले. सातपूर पोलीस स्टेशनला अकस्मात मृत्यूची नोंद करण्यात आली आहे.