नाशिक: भरधाव आयशर मालट्रकने धडक दिल्याने रस्ता ओलांडणा-या महिलेचा जागीच मृत्यू

नाशिक (प्रतिनिधी): भरधाव आयशर मालट्रकने धडक दिल्याने रस्ता ओलांडणा-या अनोळखी महिलेचा जागीच मृत्यू झाला. महिलेची अद्याप ओळख पटली नसून हा अपघात दिंडोरीरोडवरील वडनगर भागात झाला. याप्रकरणी म्हसरूळ पोलीस ठाण्यात अपघाताची नोंद करण्यात आली असून ट्रक चालकास अटक करण्यात आली आहे.

मंगेश शांताराम जाधव (रा. शिवाजीनगर, सातपूर) असे अटक करण्यात आलेल्या ट्रकचालकाचे नाव आहे. याबाबत अंमलदार योगेश पवार यांनी फिर्याद दिली आहे. सुमारे ६० त ६५ वयोगटातील अनोळखी महिला गुरूवारी (दि.२९) दुपारच्या सुमारास वडनगर येथील गोपाल कृष्ण बिल्डींगसमोरील रस्ता ओलांडत असतांना हा अपघात झाला.

नाशिक कडून दिंडोरीच्या दिशेने भरधाव वेगात जाणा-या आयशरने (एमएच१५, जेटी २५९९) तिला जोरदार धडक दिली. या अपघातात महिलेचा जागीच मृत्यू झाला. याप्रकरणी म्हसरूळ पोलिसात ट्रकचालकाविरुद्ध गुन्हा दाखल करण्यात येवून त्यास अटक करण्यात आली आहे. अधिक तपास उपनिरीक्षक मनोहर क्षिरसागर करीत आहेत. (म्हसरूळ पोलीस स्टेशन, गुन्हा रजिस्टर क्रमांक: २१०/२०२४)