नाशिक। दि. १० नोव्हेंबर २०२६: सोन्याची अंगठी खरेदी करण्याच्या बहाण्याने सराफा दुकानात शिरलेल्या दोन चोरट्यांनी दुकानदाराला बोलण्यात गुंतवून सोन्याच्या १२ अंगठ्यांचा ट्रेच लंपास केल्याची घटना उघडकीस आली आहे. लक्ष्मीपूजनाच्या दिवशी (रविवार, दि. ८ नोव्हेंबर) सायंकाळी घडलेल्या या चोरीत सुमारे तीन लाख रुपये किमतीचे सोन्याचे दागिने चोरीला गेले. या घटनेमुळे परिसरातील सराफा व्यावसायिकांमध्ये चिंतेचे वातावरण निर्माण झाले आहे.
जत्रा नांदूर रोडवरील श्रीरामनगर परिसरातील उमा अपार्टमेंटमध्ये राहणारे हेमंत दिनकर अहिरराव यांचे आर्या ज्वेलर्स अँड इंटरप्राईजेस नावाचे सराफा दुकान आहे. रविवारी सायंकाळच्या सुमारास निळ्या आणि पांढऱ्या रंगाचे शर्ट परिधान केलेले दोन अनोळखी व्यक्ती ग्राहक बनून दुकानात आले. त्यांनी सोन्याची अंगठी खरेदी करायची असल्याचे सांगत विविध डिझाइनच्या अंगठ्या दाखविण्यास सांगितले.
ग्राहकांच्या मागणीनुसार अहिरराव यांनी सुमारे साडेतीन तोळे वजनाच्या १२ सोन्याच्या अंगठ्यांचा ट्रे काउंटरवर ठेवला. यावेळी दोघांनी त्यांना संभाषणात गुंतवून ठेवले. दुकानदाराचे लक्ष विचलित झाल्याची संधी साधत पांढऱ्या रंगाचा शर्ट घातलेल्या एका चोरट्याने अंगठ्यांचा संपूर्ण ट्रे उचलला आणि दुकानातून बाहेर धूम ठोकली.
त्यानंतर दोघांनीही दुकानाबाहेर उभ्या असलेल्या चारचाकी वाहनातून घटनास्थळावरून पलायन केले. या प्रकरणी हेमंत अहिरराव यांनी तक्रार दाखल केली असून, सणासुदीच्या काळात सराफा दुकानाला लक्ष्य करणाऱ्या या चोरट्यांच्या प्रकारामुळे व्यापारी वर्गात खळबळ उडाली आहे.
