नाशिक: आजपासून निवळणार ढगाळ वातावरण; तापमान वाढणार

नाशिक (प्रतिनिधी): राज्यासह नाशिकमध्ये तीन दिवसांपासून ढगाळ वातावरण होते. उत्तरेकडून आणि पूर्वेकडून येणाऱ्या वाऱ्यांच्या संगमामुळे महाराष्ट्र ते ओडिशा दरम्यान, हवेच्या कमी दाबाचा पट्टा तयार झाल्याने अवकाळी पावसाचे वातावरण तयार झाले होते. जिल्ह्याच्या काही भागात गारपीट झाली. त्यामुळे कधी उष्ण व दमट वातावरण तर कधी वातावरणात गारवा असे संमिश्र वातावरण नागरिकांनी अनुभवले.

शुक्रवारपासून ढगाळ हवामान निवळणार असून उन्हाचा तडाखा वाढेल तसेच कमाल तापमानात वाढ होणार असल्याचा अंदाज हवामानतज्ज्ञ माणिकराव खुळे यांनी वर्तविला आहे. दरम्यान, नाशिक जिल्ह्याच्या ग्रामीण भागात बुधवारी रात्री व गुरुवारी तुरळक ठिकाणी गारपिटीसह जोरदार पाऊस झाला.