नाशिक (प्रतिनिधी): दाजीला दिलेले पैसे परत न देता भांडण करत मानसिक छळ झाल्याच्या कारणातून पतीने आत्महत्या केल्याच्या तक्रारीनुसार पतीच्या दाजीसह मित्राच्या विरोधात आत्महत्येस प्रवृत्त केल्याप्रकरणी अंबड पोलिस ठाण्यात गुन्हा दाखल करण्यात आला आहे.
पोलिसांनी दिलेली माहिती आणि कोमल भरत गांगुर्डे (रा. चुंचाळे, अंबड) यांनी दिलेल्या तक्रारीनुसार, पतीचे दाजी संशयित कृष्णा शिंदे यांना पतीने तीन लाख ५० हजार रुपये उसने दिले होते. तसेच संशयित राजेंद्र पवार यांनाही पाच लाख रुपये उसने दिले होते. उसने पैसे पती भरत गांगुर्डे यांनी परत मागितले असता दाजी शिंदे यांनी पैसे परत दिले नाही.
उलट भांडण करत पतीला मानसिक त्रास दिला. या त्रासातून पतीने गळफास लावून आत्महत्या केल्याची तक्रार दिली. याप्रकरणी संशयित कृष्णा शिंदे आणि राजेंद्र प्रवर यांच्यावर आत्महत्येस प्रवृत्त केल्याप्रकरणी गुन्हा दाखल करण्यात आला आहे. (अंबड पोलीस स्टेशन, गुन्हा रजिस्टर क्रमांक: ७६२/२०२४)
