नाशिक: शतपावली करतांना पाय घसरून नाल्यात पडल्याने तरुणीचा मृत्यू…

नाशिक (प्रतिनिधी): शतपावली करीत असताना छोट्या पुलावरून पाय घसरून नाल्यात पडल्याने बेशुद्ध झालेल्या तरुणीचा मृत्यू झाल्याची घटना ओढा गावात घडली आहे.

शिवानी ज्ञानेश्वर जाधव (वय २७, यशवंतनगर, पाथर्डी फाटा, नाशिक) ही तरुणी रात्रीच्या जेवणानंतर बाहेर फेरफटका मारत होती. ओढा गावात घराच्या बाहेर असलेल्या निकम वस्तीतील मळ्यात छोट्या लोखंडी पुलावरून जात असताना पाय घसरून ती पाणी असलेल्या नाल्यात पडली.

ती बेशुद्ध झाल्याने तिचा चुलतभाऊ पवन निकम यांनी तिला औषधोपचारासाठी जिल्हा शासकीय रुग्णालयात दाखल केले असता डॉ. शिंगे यांनी तिला तपासून मयत घोषित केले. या प्रकरणी आडगाव पोलीस ठाण्यात आकस्मिक मृत्यूची नोंद करण्यात आली आहे.