🔴 नाशिक: कारमधून गांजाची तस्करी; तब्बल १२ किलो गांजा हस्तगत !

नाशिकच्या सर्व अपडेट्ससाठी आमचा व्हॉट्सअ‍ॅप ग्रुप जॉईन करा…

नाशिक (प्रतिनिधी): अमली पदार्थविरोधी कडक कारवाई करण्याचे आदेश पोलिस आयुक्त संदीप कर्णिक यांनी दिले आहेत. गुन्हे शाखा युनिट-१च्या पथकाने चोरी-छुप्या केल्या जाणाऱ्या अमली पदार्थाच्या तस्करीची चाचपणी करून खात्रीलायक माहितीवरून आडगाव-म्हसरूळ लिंकरोडवर सापळा रचला.

यावेळी एका संशयास्पद स्वीफ्ट कार रोखून तपासणी केली असता त्यामधून एका गोणीत गांजा भरलेला आढळून आला. पोलिसांनी चालकासह त्याच्या साथीदाराला बेड्या ठोकल्या.

नाशिक शहर व परिसरात अमली पदार्थ खरेदी-विक्री ही पूर्णपणे थांबविण्यासाठी गुन्हे शाखेला कर्णिक यांनी आदेशित केले आहे. यानुसार गुन्हे शाखेकडून खबऱ्यांचे ‘नेटवर्क’ अधिकाधिक सक्रीय करण्यावर भर दिला अमली पदार्थ विक्री व तस्करी करणाऱ्यांचा शोध सुरू केला आहे.

युनिट-१चे पोलिस नाइक विशाल देवरे यांनी सुत्रे फिरवून गांजा तस्करी एका स्विफ्ट कारमधून होणार असल्याची गुप्त माहिती मिळविली. याबाबत त्यांनी वरिष्ठ पोलिस निरीक्षक विजय ढमाळ यांना कळविले.

ढमाळ यांनी तातडीने सहायक निरीक्षक हेमंत तोडकर, उपनिरीक्षक विष्णू उगले, चेतन श्रीवंत, सहायक उपनिरीक्षक रवींद्र बागुल, हवालदार प्रदीप म्हसदे, योगीराज गायकवाड, विशाल काठे, नाझीमखान पठाण आदीची दोन पथके तयार करून आडगाव- म्हसरूळ लिंकरोडवर रवाना केली.

साध्या वेशात व वाहनात पथकांनी या रस्त्यावर सापळा रचला. यावेळी संशयास्पद कार (एमएच१५ सीडी. ०३१७) भरधाव येताना पथकाला दिसली. पथकाने ही कार शासकीय वाहनाच्या सहाय्याने रोखली. यावेळी संशयित राहुल राज पवार (रा.पंचवटी) यास ताब्यात घेत कारची तपासणी सुरू केली.

यावेळी कारमध्ये १२ किलो ८४ ग्रॅम वजनाचा गांजा एका प्लास्टिकच्या गोणीत साठवून ठेवलेला सापडला गांजा, तीन मोबाइल, एक कार असा सुमारे ६ लाख ३० हजार रुपयांचा मुद्देमाल हस्तगत करण्यात आला आहे पवार याने सर्जेराव गायकवाड (रा. हिरावाडी) याच्याकडून हा गांजा विकत घेतल्याचे सांगितले. यानंतर पथकाने गायकवाड यालाही हेरून अटक केली. याप्रकरणी म्हसरूळ पोलिस ठाण्यात दोघांविरुद्ध गुन्हा दाखल करण्यात आला आहे. या दोघांना जिल्हा व सत्र न्यायालयात हजर करण्यात आले असता न्यायालयाने पोलिस कोठडी सुनावली.