नाशिक। दि. १८ ऑक्टोबर २०२६: इंडियन ऑइल कॉर्पोरेशनच्या सामाजिक उत्तरदायित्व निधीतून (सीएसआर) येवला मतदारसंघातील ४० गावांमध्ये विकासकामे करून देण्याचे आश्वासन देत चार लाख २० हजार रुपयांची फसवणूक केल्याचा प्रकार समोर आला आहे. या प्रकरणी नाशिक शहर सायबर पोलिस ठाण्यात गुन्हा दाखल करण्यात आला असून, संशयिताचा शोध घेण्यासह पुढील तपास सुरू आहे.
पोलिसांकडून मिळालेल्या माहितीनुसार, एका व्यक्तीने मोबाइलवरून संपर्क साधून आपण इंडियन ऑइल कॉर्पोरेशनच्या सीएसआर विभागातून बोलत असल्याचे सांगितले. येवला मतदारसंघातील ४० गावांमध्ये कंपनीच्या सामाजिक उत्तरदायित्व निधीतून विविध विकासकामे करण्यात येणार असल्याचे आश्वासन त्याने दिले.
या कामांसाठी प्रत्येक गावाकडून लोकसहभाग म्हणून १० हजार ५०० रुपये जमा करणे आवश्यक असल्याचे सांगण्यात आले. त्यानुसार संबंधितांना फोन-पेच्या माध्यमातून पैसे पाठविण्यास सांगण्यात आले. या व्यवहारांतून एकूण चार लाख २० हजार रुपये हस्तांतरित करून घेत आर्थिक फसवणूक करण्यात आल्याची तक्रार पोलिसांकडे करण्यात आली आहे.
संपर्क साधणाऱ्या व्यक्तीने आपले नाव अनिरुद्ध टेमकर पाटील असे सांगितल्याची नोंद तक्रारीत आहे. या नावाने संपर्क साधणाऱ्या व्यक्तीचा इंडियन ऑइल कॉर्पोरेशनशी प्रत्यक्ष संबंध होता का, तसेच फसवणुकीत आणखी कोणाचा सहभाग आहे का, याचा तपास सायबर पोलिसांकडून करण्यात येत आहे.
