नाशिक: दोन दुचाकींमध्ये झालेल्या धडकेत २२ वर्षीय युवकाचा मृत्यू

नाशिक (प्रतिनिधी): दोन दुचाकींमध्ये झालेल्या धडकेत गंभीर जखमी झालेल्या २२ वर्षीय तरूणाचा मृत्यू झाला. हा अपघात गंगापाडळी ते लाखलगाव मार्गावर झाला. याप्रकरणी आडगाव पोलीस ठाण्यात अकस्मात मृत्यूची नोंद करण्यात आली आहे.

सागर वाळू गायकर (रा.गंगापाडळी ता.जि.नाशिक) असे मृत दुचाकीस्वाराचे नाव आहे. सागर गायकर हा युवक मंगळवारी (दि.७) सायंकाळच्या सुमारास आपल्या दुचाकीवर गंगापाडळी ते लखलगाव मधील पुलावरून  प्रवास करीत असतांना हा अपघात झाला होता. अज्ञात मोटारसायकलने समोरून धडक दिली. या अपघातात गायकर गंभीर जखमी झाला होता.

मामा विलास वलवे यांनी त्यास तातडीने जिल्हा रूग्णालयात दाखल केले असता वैद्यकीय सुत्रांनी तपासून मृत घोषित केले. अधिक तपास हवालदार देसाई करीत आहेत.