नाशिक (प्रतिनिधी): सिमेंट मिक्सरच्या भरधाव डंपरने दुचाकीस्वाराला जोरदार धडक दिली. या अपघातात २२ वर्षीय तरुणाचा मृत्यू झाला. ही घटना सातपूर औद्योगिक वसाहतीत घडली.
तेजस गंगाराम बनसे (२२, रा. सावरगाव, ता. जि. नाशिक) असे मृत तरुणाचे नाव आहे. सातपूरकडून एमआयडीसीमार्गे दुचाकीने सावरगाव येथे जात असताना सातपूर औद्योगिक वसाहतीतील बाबा साई बेकरीसमोर सिमेंट मिक्सरच्या भरधाव डंपरने क्र. (एमएच १५ एक्यू ०३०२) जोरदार धडक दिली. या अपघातात तेजस गंभीर जखमी झाल्याने त्याला तत्काळ जिल्हा रुग्णालयात दाखल करण्यात आले. यावेळी वैद्यकीय अधिकाऱ्यांनी त्याला मृत घोषित केले.
पोलिसांना अपघाताची माहिती मिळताच घटनास्थळी धाव घेतली. डंपर चालकाला चौकशीसाठी ताब्यात घेण्यात आले आहे. याबाबत सातपूर पोलीस स्टेशन येथे अकस्मात मृत्यूची नोंद करण्यात आली आहे. पुढील तपास सातपूर पोलिसांचे पथक करत आहे.
