नाशिक: ऐश्वर्या राय-बच्चनला सिन्नर तहसीलदारांनी बजावली नोटीस; नेमकं काय आहे प्रकरण?
नाशिक (प्रतिनिधी): प्रसिद्ध बॉलीवूड अभिनेत्री ऐश्वर्या राय बच्चनला नाशिक जिल्ह्यातील सिन्नरच्या तहसीलदारांनी नोटीस पाठवली आहे. या नोटिशीची सर्वत्र चर्चा आता रंगली आहे. सिन्नरमधील जमीनीचा कर थकवल्याप्रकरणी ही नोटीस पाठवण्यात आली आहे.
याबाबत मिळालेली अधिक माहिती अशी की, बॉलीवूड अभिनेत्री ऐश्वर्या राय-बच्चन यांची नाशिक जिल्ह्यातील सिन्नर तालुक्यात असलेल्या ठाणेगाव जवळ आडवाडी एक जमीन आहे.
अडवाडीच्या डोंगराळ भागात सुमारे एक हेक्टर २२ एकर जमीन आहे आणि याच जमीनीच्या एक वर्षाच्या कराचे २२ हजार रुपये थकल्याने नोटीस पाठविण्यात आली आहे. प्रशासनानं ऐश्वर्या राय यांच्यासोबत इतरही बाराशे मालमत्ता धारकांना नोटीस पाठवले आहेत.
मार्च अखेरीस वसुलीचे उद्दिष्ट पूर्ण करण्यासाठी महसूल विभागाकडून कारवाई करण्यात येत आहे त्याच अनुषंगाने ही नोटीस ऐश्वर्या राय बच्चन यांना पाठवण्यात आले आहे.
तहसीलदार एकनाथ सांगळे यांनीही ऐश्वर्या रायला नोटीस पाठवली आहे. नोटीस पाठवल्यानंतर दहा दिवसांच्या आत कर भरला नाही तर कायदेशीर कारवाई करण्यात येईल. असा देखील इशारा या नोटीस मधून देण्यात आला आहे. २०२२- २३ या वर्षाचा २१ हजार ९६० आणि नोटीशीचा दहा रुपये खर्च असा एकूण२१,९७० रुपयांचा कर बाकी असल्याने तहसीलदारांनी नोटीस पाठवली आहे.
ऐश्वर्या रायला पाठवलेली नोटीस ९ जानेवारी २०२३ रोजी काढण्यात आलेली आहे. ऐश्वर्या राय-बच्चन तिच्यासह तालुक्यातील अन्य थकबाकीदारांना देखील नोटीस पाठविण्यात आली आहे. परंतु एका प्रसिद्ध अभिनेत्रीच्या मालमत्तेचा कर बाकी असल्याने ही नोटीस पाठविण्यात आल्यानं आश्चर्य व्यक्त केलं जात आहे.
मार्च अखेरीस करवसुलीचे उद्दिष्ट पूर्ण करण्यासाठी महसूल विभागाकडून कर वसूल करण्यासाठी थकबाकीदारांना नोटीस पाठवल्या जातात तसेच कारवाई देखील केली जाते. त्यामुळे ऐश्वर्या राय-बच्चनला देखील सिन्नर तहसीलदारांनी कर वसुलीचे उद्दिष्ट पूर्ण करण्यासाठी नोटीस पाठवली आहे.
