जम्मू-काश्मीर पोलिसांची कारवाई
नाशिक (प्रतिनिधी): लष्कराच्या कंत्राटात कोट्यवधींचा अपहार केल्याप्रकरणी नाशिकचे बांधकाम व्यावसायिक रत्नाकर पवार यांना जम्मू-काश्मीर पोलिसांनी पाच दिवसांपूर्वी अटक केली.
गंगापूर पोलिस ठाण्यात याबाबत नोंद करण्यात आली असून सुमारे ५० कोटींचा अपहार केल्याची माहिती सूत्रांनी दिली. पोलिसांनी दिलेली माहिती अशी, कंत्राटदार पवार हे महानगरपालिका, जिल्हा परिषद आणि अन्य शासकीय विभागांत विविध कामांचे कंत्राट घेतात. त्यांनी ५ वर्षांपूर्वी जम्मू- काश्मीरमध्येही लष्कराचे मोठे कंत्राट मिळवले होते.
लष्कराला विविध वस्तू पुरवठा करण्याच्या कामात पवार यांनी सुमारे ५० कोटींचा अपहार केल्याचे लष्करी प्रशासनाच्या निदर्शनास आले. संबंधित अधिकाऱ्याच्या तक्रारीनुसार जम्मू-काश्मीर पोलिसांच्या आर्थिक गुन्हे विभागात पवार यांच्याविरोधात फसवणुकीचा गुन्हा दाखल करण्यात आला होता.
जम्मू-काश्मीरचे पोलिस त्यांच्या मागावर होते. ते गंगापूर पोलिस ठाण्याच्या हद्दीत वास्तव्यास असल्याची माहिती पोलिसांना मिळाली. काश्मीर पोलिसांनी गंगापूर पोलिस ठाण्याचे वरिष्ठ निरीक्षक रियाज शेख यांच्याशी संपर्क साधून पवार यांना चौकशीसाठी बोलावून त्यांना ताब्यात घेतल्याची पोलिस ठाण्यात नोंद केली. त्यानंतर जम्मू- काश्मीर पोलिस रवाना झाले.
